अञ्जना चौहान
कपिलवस्तु । कपिलवस्तुको शुद्धोधन गाउँपालिका अन्तर्गत लबनीमा जेष्ठ नागरिक स्वास्थ्य प्रवर्द्धन कार्यक्रम सम्पन्न भएको छ । सोमबार शुद्धोधन गाउँपालिका-४ मुडफुटवा स्थित विठुवा आयुर्वेद औषधालयको आयोजनामा उक्त जेष्ठ नागरिक स्वास्थ्य प्रवर्द्धन कार्यक्रम भएको हो ।
कार्यक्रममा बोल्दै आयुर्वेद औषधालय लबनी शाखाकी प्रमुख सुधा कुमारी द्विवेदीले स्वास्थ्य जीवनशैलीका लागि दैनिक योग, ध्यान, व्यायाम, सूर्यनमस्कार लगायत कुराहरुमा ध्यान दिनुपर्ने बताउनुभयो । उहाँले शरीरको प्रतिरोधात्मक क्षमता बढाउन बिहान उठेपछि खालीपेट तातो पानी खाँदा शरीरलाई अचुक फाइदा हुने बताउनुभयो ।
शारीरिक तन्दुरुस्तीका लागि गरिने विभिन्न क्रियाकलापहरुको बारेमा जेष्ठ नागरिकहरुलाई जानकारी गराउनुका साथै सोमबार, बुधबार र शुक्रबार आयुर्वेद औषधालय लबनी शाखामा वाथरोगको परिक्षण तथा उपचार हुने जानकारी गराउनुभएको थियो ।
शुद्धोधन गाउँपालिकाका अध्यक्ष निसाद अहमद खानको प्रमुख आतिथ्यता र आयुर्वेद औषधालय लबनी शाखा प्रमुख सुधा कुमारी द्विवेदी, शिवलाल गैरे, योजना शाखा प्रमुख इश्वरी न्यौपाने लगायतको उपस्थितिमा भएको उक्त कार्यक्रममा २५ जना जेष्ठ नागरिकहरुलाई ब्लड प्रेसर चेकजाँच गरि च्यवनप्रास र मालिस तेल समेत वितरण गरिएको थियो ।
