भैरहवा, २२ जेठ । जनकपुरबाट भैरहवा आउँदै गरेको बस रोहिणी पुलमा दुर्घटना भएको छ । आज विहान साढे चार बजे जनकपुरबाट भैरहवा आउँदै गरेको लु २ ख ३८४१ नम्बरको बस बैकुण्ठपुरस्थित रोहिणी पुलबाट नदीमा खसेर दुर्घटना भएको हो । दुर्घटनामा ९ जनाको मृत्यु समेत भएको छ भने २३ जना घाइते भएका छन् ।
रोहिणी गाउँपालिका र ओमसतिया गाउँपालिकाको बीचमा पर्ने रोहिणी पुलबाट नदीमा खसेको उक्त बसमा ३२ जना यात्रु सवार रहेको जिल्ला प्रहरी कार्यालय रुपन्देहीले जनाएको छ । दुर्घटनामा घाइते भएकालाई प्रहरीले उद्दार गरी भैरहवा स्थित भिम अस्पताल र युनिभर्सल मेडिकल कलेजमा उपचारको लागि पठाएको हो ।
विहानको समयमा चालक निदाएको कारण दुर्घटना भएको हुन सक्ने जिल्ला प्रहरी कार्यालयका कुल प्रसाद बेलबासेले जानकारी दिए । चालक समेत घाइते भएको कारण घटना के कसरी भएको भन्ने विस्तृत जानकारी आउन नसकेको उनले बताए ।
