भैरहवा । विगत ११ वर्षदेखि भैरहवाबाट निरन्तर प्रकाशित हुने लुम्बिनीखबर पत्रिकाका सम्पादक पत्रकार कमल रायमाझीलाई मातृशोक परेको छ ।
ओमसतिया गाउँपालिका वडा नं. ४ बालापुर निवासी पत्रकार रायमाझीका माता रुपकला रायमाझीको हिजो फागुन १ गते आइतबारका दिन ७६ वर्षको उमेरमा निधन भएको हो ।
लामो समयदेखि रुपन्देहीलाई कर्मथलो बनाएर पत्रकारिता गरिरहेका रायमाझी प्रेस सेन्टर नेपाल रुपन्देहीका अध्यक्ष हुन् । पत्रकार रायमाझी रासस, लुम्बिनीखबर, समता टेलिभिजन, सागरमाथा टेलिभिजन लगायत मिडियामा आबद्ध छन् ।
नेपाल पत्रकार महासंघ रुपन्देहीका पूर्व सह-सचिव तथा लुम्बिनी प्रेस क्लबका महासचिव समेत रहेका पत्रकार रायमाझीलाई परेको मातृशोकमा प्रेस सेन्टर नेपाल रुपन्देही शाखा, नेपाल पत्रकार महासंघ रुपन्देही लगायतका संघ-संस्थाहरुले शोक वक्तव्य जारी गरेर दु:ख व्यक्त गरेका छन् ।
