लुम्बिनीखबर
भैरहवा, १५ जेठ । जेठ १५ मुलुकमा गणतन्त्र घोषणा भएको दिन । नेपाल र नेपालीकोलागी अत्यन्त महत्वपुर्ण ऐतिहासीक यो दिन औपचारिकतामै सीमित भएको छ ।
जनआन्दोलन २०६२। ६३ को जगमा भएको निर्वाचनबाट गठित संविधानसभाको पहिलो बैठकले २०६५ जेठ १५ गते नेपाललाई सङ्घीय लोकतान्त्रिक गणतन्त्र घोषणा गरेको थियो । दुई सय ३८ वर्ष लामो शाहवंश राजपरम्पराको अन्त्यको घोषणा भएको उक्त दिनलाई प्रत्येक वर्ष गणतन्त्र दिवसका रुपमा मनाउन थालिएको छ ।
जनआन्दोलन २०६२। ६३ मा मात्रै तीस जना भन्दा बढीको सहादत, हजारौ अंगभंग भई ल्याएको गणतन्त्रकोलागी ००७ सालदेखीका आन्दोलन र संघर्षको दौडान हजारौंले बलिदानी दिएका छन् ।
हजारौं शहिदहरुको रगतबाट साटिएर आएको गणतन्त्र दिवसको अवसरमा सरकारले झारा टार्ने मात्रै काम गरेको छ । दल एवं दल निकट भातृसंगठन, विभिन्न संघसंस्था एवं निकायले पनि यो दिवसलाई औपाचारीक विसौनी मात्रै बनाएका छन् । राष्ट्रपतिले केही कैदीलाई सजाय माफी गर्दै कैद मुक्त गरिएको छ । सरकारले यसै दिनको अवसर पारेर आर्थिक वर्ष ०७३।०७४ को बजेट ल्याएको छ ।
तर पनि गणतन्त्र दिवसको अवसरमा जनतामा उत्साह छैन । त्यति ठूलो बलिदानी र संघर्षबाट आएको गणतन्त्र दिवसमा आम जनताको उत्साह र उमंग नहुनुमा राजनितीक खिचातानी भएको बुझिएको छ । जनतालाई राणाकाल, शाहकाल, पन्चायत, प्रजातन्त्र, लोकतन्त्र, गणतन्त्र जे आएता पनि जनताको जीवनस्तर जहांको त्यहिं भएपछि जनतामा गणतन्त्र दिवसले खासै ल्याउन नसकेको हो ।
