लुम्बिनीखबर
भैरहवा, पुस ५ । पार्टी नेकपा एमालेको भातृ संगठन युवा संघ नेपाल रुपन्देहीका अध्यक्ष दुर्गा तिवारीको हत्याको भत्र्सना गर्दै अखिल नेपाल महिला संघ रुपन्देहीले खेद प्रकट गरेको छ ।
सोमबार अपरान्ह ३ः४५ बजेतिर मोटरसाइकलमा पिछा गर्दै आएका अज्ञात व्यक्तिबाट देवदह खैरेनीमा गोली हानी हत्या गरिएका तिवारी पछिल्लो समय रुपन्देही लगायतका लुम्बिनी अञ्चलका जिल्लाहरुमा भएको प्रदेश नं ५ का जिल्लाहरुलाई टुक्राउने गरी गरिएको ४ बुँदे प्रस्ताव विरुद्धको आन्दोलनमा सक्रिय रुपमा सहभागी थिए ।
संघले सोमबार खेद विज्ञप्ति जारी गर्दै युवा संघ नेपालका अत्यन्त होनहार, जुझारु, कर्मठ, इमान्दार र शालीन व्यक्तित्व दुर्गा तिवारीको हत्याको पछाडि विशुद्ध राजनीतिक कारण भएको भन्दै कायरतापूर्ण गरिएको हत्याको छानबिन गरी हत्यारालाई अबिलम्व गिरफ्तार गरी हदै सम्मको कडा कार्वाही गर्न सरकार संग माग गरेको छ ।
साथै रुपन्देही जिल्लामा बढिरहेको असुरक्षा र आपराधिक गतिविधिलाई अविलम्ब नियन्त्रण गरी कडा भन्दा कडा सुरक्षा व्यवस्था मिलाउन प्रहरी प्रशासन लगायत सरकार समक्ष माग गरेको छ ।
संघले विज्ञप्तिमा ४ बुँदे प्रस्ताव र तिवारी हत्याको विरुद्ध उठिरहेको आन्दोलनमा अनेमसंघ रुपन्देही संघर्षशील एवं जुझारु ऐक्यबद्धता जाहेर गर्न सम्पूर्ण अनेमसंघ र महिला दिदीबहिनीहरुमा हार्दिक अपिल समेत गरेको छ ।
