सिद्धार्थनगर नगरपालिकाको सहकार्य र भैरहवा तेक्वान्दो क्लबको आयोजनामा तेक्वान्दो प्रतियोगिता
सुरज ज्ञवाली
भैरहवा, २६ वैशाख । रुपन्देहीको भैरहवा तेक्वान्दो क्लबको आयोजना तथा सिद्धार्थनगर नगरपालिकाको सहयोगमा भैरहवामा प्रथम सिद्धार्थनगर आमन्त्रण खुल्ला तेक्वान्दो प्रतियोगिता सम्पन्न भएको छ ।
वैशाख २३ गते शनिवारदेखि २४ गते आइतवार गरी दुई दिनसम्म संचालन भएको प्रतियोगितामा २५ वटा टीमको सहभागीता रहेको कार्यक्रम संयोजक तथा भैरहवा तेक्वान्दो क्लबले जनाएको छ ।
प्रतियोगितामा ८ स्वर्ण, १ रजत र ४ कास्य गरी १३ पदक जित्दै हाई किकर्ष तेक्वान्दो डोजाङ नवलपरासी प्रथम भएको छ भने ६ स्वर्ण, ७ रजत र ५ कास्य गरी १८ पदक जित्दै आयोजक भैरहवा तेक्वान्दो क्लब द्वितीय र ५ स्वर्ण, ३ रजत र २ कास्य गरी १० पदक जित्दै खजहना तेक्वान्दो सेन्टर तृतीय भएको आयोजक स्रोतले जनाएको छ ।
उक्त प्रतियोगितामा सर्वाेत्कृष्ट खेलाडी पुरुष तर्फ सैनामैनाका असिम पोखरेल, महिलातर्फ आर्य पब्लिकी ऋतिका शर्मा र अनुशासित टीमबाट शुभ संस्कार स्कूल सम्मानित भएको आयोजकले जनाएको छ ।
कार्यक्रम समापन सिद्धार्थनगर नगरपालिकाकी उपप्रमुख तथा कार्यक्रमका प्रमुख अतिथि उमा अधिकारीले आगामी दिनमा पनि यस्ता प्रतियोगितालाई निरन्तरता दिने बताउनुभयो । नगरपालिका उपप्रमुख अधिकारीले खेलकुद क्षेत्रको विकास र प्रगतिका लागि नगरपालिका सधै सहकार्य गर्ने जनाउनुभयो ।
सिद्धार्थनगर नगरपालिका वडा नम्बर ३ का वडाअध्यक्ष तथा कार्यक्रमका अतिथि नारायण प्रसाद उपाध्यायले खेलकुद क्षेत्रको विकासका लागि यस्ता प्रतियोगिताहरुले महत्वपूर्ण भूमिका खेल्ने जानकारी दिनुभयो ।
भैरहवा तेक्वान्दो क्लबका अध्यक्ष एक नारायण आर्यालले प्रतियोगिता सफलतापूर्वक सम्पन्न गर्न सहयोग गर्ने सबैलाई धन्यवाद ज्ञापन गरेका थिए भने केशव चौधरीको सञ्चालनमा कार्यक्रम सम्पन्न भएको थियो ।
