लुम्बिनीखबर
भैरहवा, भदौ । रुपन्देही जिल्लामा भदौ २७ जिल्ला सुरक्षा समिति बैठकले दिउँसोमा निषेधाज्ञा र रातिमा कफ्र्यु लगाउने निर्णय गरेको छ ।
निषेधाज्ञा हरेक दिन विहान ६ बजेदेखि राति १० बजेसम्म लागू गरिएको छ भने राति १० बजेदेखि विहान ६ बजेसम्म कफ्र्यु रहने छ । निषेधाज्ञा र कफ्र्यु अर्को आदेश नहुँदासम्म यथावत रहने रुपन्देहीका प्रमुख जिल्ला अधिकारी डा.टोकराज पाण्डेले बताउनुभयो । निषेधाज्ञा अवधिभर पाँच जनाभन्दा बढी व्यक्ति भेला जम्मा भई अनसन, धर्ना, घेराउ, जुलुस, प्रदर्शन तथा सभा जस्ता विरोधका कार्यक्रम गर्न पाइने छैन ।
रुपन्देहीका प्रमुख जिल्ला अधिकारी डा.पाण्डेका अनुसार, स्थानीय प्रशासन ऐन २०२८ को दफा २६ ‘क’ बमोजिम यो आदेश जारी गरिएको हो । कफ्र्यु अवधिमा कसैले आवतजावत गर्ने, भेला, जुलुस, प्रदर्शन, सभा, बैठक वा घेराउ गरेमा प्रचलित कानूनअनुसार कडा कारबाही गरिने जिल्ला प्रशासन कार्यालयले जनाएको छ ।
प्रमुख जिल्ला अधिकारी डा. पाण्डेले जिल्लाका विभिन्न क्षेत्रमा हुन सक्ने प्रदर्शन, जुलुस, हुलदङ्गा तथा झडपका कारण शान्ति सुरक्षामा खलल पुग्ने सम्भावनालाई मध्यनजर गर्दै कफ्र्यु आदेश जारी गरिएको बताउनुभयो । उहाँले शान्ति र सुरक्षा कायम राख्न सबैलाई सहयोग गर्न आग्रह गर्नुभएको छ ।
