पशुपति यादव। लुम्बिनीखबर
रोहिणी , २८ मंसिर। रोहिणी गाउँपालिकाले पहिलो चौमासिक सार्वजनिक सुनुवाई कार्यक्रम सम्पन्न गरेको छ। यो कार्यक्रमले गाउँपालिकाको विकास योजनाहरूको प्रगति र स्थानीयहरूका सुझावहरूलाई मञ्च प्रदान गरेको छ। समता टेलिभिजन नेटवर्क प्रा. लि. को आयोजना र रोहिणी गाउँपालिकाको समन्वयमा सार्वजनिक सुनुवाई कार्यक्रम सम्पन्न भएको हो।
कार्यक्रममा योजना शाखा प्रमुख दीपा सुवेदीले गत चार महिनाभित्रका योजनाहरूको पूर्ण विवरण प्रस्तुत गर्नुभयो। उहाँले योजना सम्झौता, कार्यान्वयन, फर्छ्यौट र प्रक्रियामा रहेका योजनाहरूको बारेमा विस्तृत जानकारी दिनुभयो।
सुनुवाई कार्यक्रममा उपस्थित स्थानीय बासिन्दाहरूले गाउँपालिकाले गर्नुपर्ने कार्यहरू, देखिएका कमीकमजोरीहरू, प्रशासनिक कार्यान्वयन, वडास्तरीय समस्याहरू, विकास निर्माण, शिक्षा क्षेत्रको आवश्यकता, स्वास्थ्य, खानेपानी, पूर्वाधार, बाटोघाटो लगायतका विषयमा आफ्ना धारणा राख्नुभयो। उहाँहरूले गाउँपालिकाले केही कार्यहरू गरेको भए पनि थप प्रयास आवश्यक रहेको सुझाव दिनुभयो।
विभिन्न वडाका स्थानीयहरूले सुझाव राख्नुभएको थियो। जसमध्ये संजय कुमार गुप्ता, राज कुमार यादव, विजय यादव, चन्द्रभान तिवारी, जय प्रकाश यादव, सुधीर सिंह मिश्रा, योगेन्द्र चौधरी, दुरबिजय पासी, रमकेवल, कन्छा कोहार लगायतका व्यक्तिहरूले विकाससम्बन्धी आफ्ना विचार व्यक्त गर्नुभयो।
कार्यक्रममा गाउँपालिका अध्यक्ष विद्या प्रसाद यादवले स्थानीयहरूबाट आएका सुझावहरूलाई छिट्टै कार्यान्वयनमा ल्याउने प्रतिबद्धता व्यक्त गर्नुभयो। उहाँले विस्तारमा भन्नुभयो, “आजको यो सार्वजनिक सुनुवाई कार्यक्रम अत्यन्त फलदायी भएको छ। स्थानीय बासिन्दाहरूले शिक्षा, स्वास्थ्य, खानेपानी, सडक पूर्वाधार, कृषि र रोजगारीका क्षेत्रमा उठाउनुभएका मुद्दाहरू हाम्रा लागि मार्गदर्शक छन्। गत चार महिनामा हामीले धेरै योजनाहरूको सम्झौता र कार्यान्वयन गरेका छौं, तर जनताका अपेक्षा अनुसार अझै गर्न बाँकी छ। यहाँहरूले देखाउनुभएका कमीकमजोरीहरूलाई हामी सुधार्ने छौं। विशेष गरी वडास्तरीय सडकहरूको स्तरोन्नति, विद्यालयहरूमा शिक्षक व्यवस्थापन, स्वास्थ्य चौकीहरूमा औषधि र जनशक्तिको उपलब्धता, खानेपानीको दीगो व्यवस्थापन र कृषकहरूलाई बीउबिजन तथा सिँचाइ सुविधा प्रदान गर्नेलाई प्राथमिकतामा राखेका छौं। यो गाउँपालिकालाई समृद्ध बनाउन जनताको सक्रिय सहभागिता आवश्यक छ। हामी सबै मिलेर रोहिणीलाई प्रदेशकै नमुना गाउँपालिका बनाउने छौं। आएका सुझावहरूलाई योजना तर्जुमामा समावेश गर्दै आगामी बजेट र कार्यक्रममा सम्बोधन गर्नेछौं। जनप्रतिनिधि र जनता बीचको यो संवादले पारदर्शिता र जवाफदेहिता बढाउँछ।”
कार्यक्रममा उपाध्यक्ष शिव कान्ती हरिजनले स्थानीय बासिन्दाहरूले आफ्ना आवश्यकता र सुझावहरू यस्ता कार्यक्रममा राख्नुपर्नेमा जोड दिनुभयो। उहाँले भन्नुभयो, “सार्वजनिक सुनुवाई जनता र जनप्रतिनिधिबीचको महत्वपूर्ण संवाद हो। यहाँहरूले गाउँपालिका भित्रका गतिविधिहरूका समस्या उठाउनुभयो, जुन हाम्रा लागि प्राथमिकता हुन्। शिक्षा र स्वास्थ्यमा पहुँच, खानेपानी र सरसफाइ, पूर्वाधार विकासमा समावेशीकरण आवश्यक छ। यस्ता कार्यक्रममा बढीभन्दा बढी उपस्थित भएर सुझाव दिनुहोस्। यो सहभागिताले मात्र समावेशी विकास सम्भव छ। रोहिणीको समृद्धिका लागि सबैको साथ चाहिन्छ।”
त्यसै गरी प्रशासकीय अधिकृत जगत बहादुर बस्नेतले प्रशासनिक व्यवस्थापनसम्बन्धी जानकारी गराउँदै आएका सुझावहरूलाई आत्मसात् गरी अगाडि बढ्ने बताउनुभयो। उहाँले भन्नुभयो, “गाउँपालिकाको प्रशासनिक संयन्त्र पूर्ण रूपमा जनताको सेवामा समर्पित छ। आज उठेका प्रशासनिक सेवा प्रवाह, योजना कार्यान्वयनको गति र पारदर्शितासम्बन्धी सुझावहरूलाई हामीले गम्भीरतापूर्वक लिएका छौं। चार महिनाको प्रगतिमा योजना फर्छ्यौट र सम्झौतामा सन्तोषजनक काम भएको छ, तर स्थानीयका गुनासा अनुसार थप चुस्त बनाउनेछौं। कर्मचारीहरूलाई थप जिम्मेवार बनाउँदै सेवा प्रवाहलाई डिजिटलाइजेशन र छिटोछरितो बनाउने छौं। सुझावहरूलाई नीतिगत रूपमा कार्यान्वयन गर्दै बजेट व्यवस्थापन, कर्मचारी व्यवस्थापन र योजना अनुगमनलाई मजबुत बनाउनेछौं। जनताका समस्या समाधानमा ढिलासुस्ती हुन दिँदैनौं। यो सुनुवाईले प्रशासनलाई थप जवाफदेही बनाएको छ।”
यसैगरी, वडा नं. ३ का वडाध्यक्ष तथा गाउँपालिकाका प्रवक्ता वीर बहादुर क्षेत्री, वडा नं. १ का वडाध्यक्ष अविद अलि देवान, वडा नं. ४, ५, ६, लगायतका वडाध्यक्षहरूले पनि आफ्ना भनाइ राख्नुभयो।
कार्यक्रमको सञ्चालन समता टेलिभिजनकी अस्मिता अधिकारी ले गर्नुभएको थियो भने कार्यक्रमको अध्यक्षता मनोज क्षेत्रीले गर्नुभई स्वागत मन्तव्य राख्नुभएको थियो।
यो सार्वजनिक सुनुवाईले गाउँपालिका र स्थानीय बासिन्दाबीचको सम्बन्धलाई थप मजबुत बनाउने अपेक्षा गरिएको छ।
