लुम्बिनीखबर
सिद्धार्थनगर, वैशाख । स्थानीय मिडियाहरू आर्थिक संकट, डिजिटल चुनौती र विज्ञापन अभावका कारण अस्तित्व संकटमा परिरहेको वर्तमान अवस्थामा “कसरी बचाउने स्थानीय मिडिया ?” विषयक अन्तरक्रिया कार्यक्रम भोलि बुटवलमा आयोजना हुँदैछ ।
नेपाल पत्रकार महासंघ रुपन्देही शाखाको आयोजनामा बुटवल उद्योग वाणिज्य संघको सभाहलमा हुने उक्त कार्यक्रममा स्थानीय मिडियाका प्रमुख सम्पादक, व्यवस्थापक तथा विज्ञहरूले गहन छलफल गर्ने छन् ।
कार्यक्रममा प्यानलिस्टका रूपमा डा. बालकृष्ण चापागाईं (प्रधान सम्पादक/प्रकाशक, दैनिक पत्र दैनिक), एजाज आलम (अध्यक्ष, लुम्बिनी सामुदायिक टेलिभिजन), गौतम भुसाल (प्रबन्ध सम्पादक, ग्लोबल संचार गृह), कल्पना तिवारी (स्टेसन म्यानेजर, रेडियो नेपाल) र कमल रायमाझी (सम्पादक/सञ्चालक, लुम्बिनी खबर) सहभागी रहनेछन् । कार्यक्रमको सहजकर्ताको भूमिकामा कपिल ज्ञवाली रहनेछन् ।
अन्तरक्रियामा स्थानीय मिडियाले सामना गरिरहेको आर्थिक संकट, डिजिटल युगको चुनौती, विज्ञापनको कमी, दक्ष जनशक्ति अभावलगायत समसामयिक विषयमा छलफल हुनेछ । साथै, स्थानीय सञ्चार माध्यमहरूलाई टिकाउ र सशक्त बनाउने रणनीति तथा आवश्यक नीतिगत सुधारका लागि सुझावहरू प्रस्तुत गरिनेछ ।
नेपाल पत्रकार महासंघ रुपन्देही शाखाले ‘मिडिया मन्थन’ शृङ्खलाअन्तर्गत आयोजना गरेको यो कार्यक्रमले स्थानीय मिडियाको भविष्यलाई लिएर चिन्तित सञ्चारकर्मी तथा सरोकारवालाहरूलाई सान्दर्भिक बहसको अवसर प्रदान गर्ने आयोजकको भनाइ छ ।
