लुम्बिनीखबर
बुटवल, १८ असोज । बुटवलमा सम्पन्न दोस्रो संस्करणको मदन भण्डारी कप अन्तर्राष्ट्रिय आमन्त्रित रनिङशिल्ड पुरुष भलिबल प्रतियोगिताको उपाधि नेपाल पुलिस क्लबले जितेको छ। उपाधिसँगै पुलिसले रु. सात लाख पुरस्कार प्राप्त गरेको छ। शनिबार भएको फाइनल खेलमा पुलिसले सभापोखरी भलिबल क्लब सङ्खुवासभालाई ३–० को सोझो सेटमा पराजित गर्दै उपाधि हात पारेको हो। भारतीय खेलाडीको साथ पाएको सभापोखरीविरुद्ध पुलिसले उत्कृष्ट प्रदर्शन गरेको थियो। लिग चरणदेखि नै प्रभावशाली प्रदर्शन गर्दै आएको सभापोखरी फाइनलमा भने पुलिससँग पराजित भयो।
उपविजेता सभापोखरीले रु। तीन लाख ५० हजार पुरस्कार प्राप्त गर्यो। विभागीय टोली सशस्त्र प्रहरी बल (एपीएफ) क्लब तेस्रो भयो। तेस्रो स्थानका लागि भएको खेलमा एपीएफले खैरा भलिबल क्लब पञ्जाबलाई ३–१ को सेटमा पराजित गर्यो। तेस्रो भएको एपीएफले रु. एक लाख ७५ हजार तथा चौथो भएको खैरा क्लबले रु.७५ हजार सान्त्वना पुरस्कार प्राप्त गर्यो। प्रतियोगिताको सर्वोत्कृष्ट खेलाडी नेपाल पुलिस क्लबका पहल गहतराज घोषित हुनुभयो। उहाँले रु. १५ हजार पुरस्कार प्राप्त गर्नुभयो। विधागततर्फ एपीएफका सरोज बर्देवा उत्कृष्ट स्पाइकर, पुलिसका बलराम गुरुङ उत्कृष्ट सेटर, रेशम छन्त्याल उत्कृष्ट सर्भर, सभापोखरीका सिभानसेन भी उत्कृष्ट ब्लकर, सन्तोष राई उत्कृष्ट डिफेन्डर तथा पुलिसका चन्द्र कुँवर उत्कृष्ट प्रशिक्षक घोषित हुनुभयो। विधागततर्फका उत्कृष्ट खेलाडीले जनही रु। आठ हजार प्राप्त गरे।
पुरस्कार वितरण कार्यक्रममा लुम्बिनी प्रदेशका युवा तथा खेलकुदमन्त्री रामजी घिमिरेले प्रतियोगितामा सहभागी खेलाडी तथा विजेता टोलीलाई बधाई तथा शुभकामना दिनुभयो। उहाँले खेल क्षेत्रको विकासले देशको समग्र विकासमा योगदान पुर्याउने बताउनुभयो। मदन भण्डारी स्पोर्ट्स एकेडेमीका अध्यक्ष ध्रुव आचार्यले प्रतियोगिताले राष्ट्रिय तथा अन्तर्राष्ट्रियस्तरका खेलाडीबीच प्रतिस्पर्धाको अवसर सिर्जना गरेको बताउनुभयो। असोज १२ गतेदेखि सञ्चालन भएको प्रतियोगितामा नेपालका चार तथा विदेशका तीन गरी सात टोलीको सहभागिता रहेको थियो।
