tपशुपति यादव
भैरहवा, २८ पुस ।
रुपन्देहीको ओमसतिया गाउँपालिका वडा नम्बर ६ स्थित नरैनापुरमा माघ १ गतेदेखि ५ गतेसम्म ‘चौथो ओमसतिया तथा कला संस्कृति महोत्सव–२०७९’ हुने भएको छ । श्री राम जानकी मन्दिर रंगशाला, सभाहल व्यवस्थापन तथा संरक्षण समिति ओमसतिया–६ नरैनापुरको आयोजनामा महोत्सव हुने आयोजकले बुधबार पत्रकार सम्मेलन गरी जानकारी गराएका छन् ।
सम्पदा र संस्कृतिको जर्गेना गर्ने उद्देश्यले महोत्सव आयोजना गर्न लागिएको आयोजक समितिका संयोजक तथा ओमसतिया गाउँपालिका–६ का वडाअध्यक्ष शिव कुमार धवलले बताए ।
नरैनापुर रंगशालामा हुने महोत्सवमा माघ १ देखि ३ गतेसम्म कुस्ती महामुकाबला प्रतियोगिता, ५ गतेसम्म झुमडा तथा टिकटक स्टारहरुको प्रतियोगिता, अन्तरविद्यालय नृत्य प्रतियोगिता तथा बेलुकी ६ बजेदेखि बिराहा साँस्कृतिक कार्यक्रमका साथै राष्ट्रिय कलाकारहरुको प्रस्तुति रहने धवलले जानकारी दिए । महोत्सवमा देवा पहलवानसहित अन्तर्राष्ट्रिय कुस्ती पहलवानहरुको सहभागीता रहने उनले बताए ।
उनले भने, ‘महोत्सवमा स्थानीय उत्पादनहरुको प्रदर्शन तथा विक्री, कृषि प्रदर्शन, माघीको अवसरमा खिचडी उत्सव, भुमडा प्रतियोगिता, बिराहा तथा थारु संस्कृति झल्किने कार्यक्रम समेत हुनेछ । ’महोत्सवमा प्रवेश तथा स्टल राख्न समेत निःशुल्क व्यवस्था रहेको उनले जानकारी दिए ।
महोत्सवमा करिब २० लाख खर्च लाग्ने आयोजकले जनाएका छन् । महोत्सबाट बचेको रकम एम्बुलेन्स खरिदमा प्रयोग गरिने तथा एम्बुलेन्स खरिदको सहयोगका लागि महोत्सवस्थलमा दानपेटिकामा राखिने आयोजकले जनाएका छन् ।
