काठमाडौं, २८ जेठ । हालै फोब्सले ‘ बजेट यात्रीका लागि २० शहर’ को सूचि सार्वजनिक गरेको छ । उक्त सूचिमा नेपालको पोखरा पहिलो स्थानमा आएको छ ।
‘प्राइस अफ ट्राभल’ले विश्व यात्रामा हुने खर्चबारे प्रकाशित गरेको तथ्याङ्कका आधारमा फोब्सले उक्त सूचित तयार पारेको हो । राम्रो र सस्तो होस्टेलमा हुने डम बेड, ३ पटकको खाना, ३ वटा सस्ता वियर, सार्वजनिक स्थानमा गरिने २ वटा यात्रा र १ साँस्कृतिक भ्रमणमा प्रतिदिन हुने खर्चका आधारमा यो सूचि तयार पारिएको हो ।
बजेट बनाएर विश्व भ्रमणमा निस्कने मानिसका लागि पोखरा सबैभन्दा सस्तो गन्तव्य बनेको छ । उक्त शहरमा माथि उल्लेखित सुविधा प्रति दिन १५.८४ अमेरिकी डलर खर्च गर्दा प्राप्त गर्न सकिन्छ । राजधानी काठमाडौं भने १९.७६ अमेरिकी डलरसहित सातौं स्थानमा रहेको छ ।
भियतनामको हनोइ १७.१३ अमेरिकी डलर र होचिमिन्ह १८.३० अमेरिकी डलर सहित क्रमशः दोश्रो र तेश्रो स्थानमा परेका छन् । त्यस्तै भारतको गोवा (१८.५९ डलर), थाइल्याण्डको चियाङ माई (१९.०३ डलर) र लाओसको भियन्सेन्ट (१९.६८ डलर) सहित क्रमशः चौथो, पाँचौ र छैटौ स्थानमा रहेका छन् ।
