बिशन गुरुङ
भैरहवा, ३० असाेज। नेपाल राष्ट्र बैंक सिद्धार्थनगरले दशैँका लागि नयाँ नोट वितरण सुरु गरेको छ । असोज २९ गतेबाट नयाँ नोट वितरण गर्न सुरु गरेको हो । ग्राहकलाई मध्य नजर गरी ४ वटा काउन्टर निर्माण गरी नयाँ नोट वितरण सुरु गरिएको राष्ट्र बैंकको सिद्धार्थनगर कार्यालयले जनाएको छ ।
नयाँ नोट वितरण भएपछि नयाँ नोट साट्नेहरुको लाइन लागेको राष्ट्र बैंकको सिद्धार्थनगरको बाहिर पट्टि देखिन्छ । रु. ५ देखि १०० सम्मका नयाँ नोट वितरण गर्ने व्यवस्था राष्ट्र बैक सिद्धार्थनगरले गरेको छ । एक व्यक्तिले रु.१८ हजार ५ सय सम्मको नयाँ नोट साट्न पाउने व्यवस्था छ । नेपाल राष्ट्र बैंक सिद्धार्थनगरले नयाँ नोटका साथै यो वर्षदेखि प्रयोगमा आइसकेका सफा नोट समेत वितरण सुरु गरेको छ । वृद्ध, असाहय, अशक्तका लागि राष्ट्र बैंकले विशेष काउन्टरको व्यवस्था गरी नयाँ नोट वितरण गरेको नेपाल राष्ट्र बैंक सिद्धार्थनगरका प्रमुख सत्येन्द्र राज सुवेदीले बताए ।
नेपाल राष्ट्र बैंक सिद्धार्थनगरले प्रत्येक दिन ४ हजार जना सम्मलाई नयाँ नोट वितरण गर्ने गरेको छ । वाणिज्य बैंकहरुलाई सफा नोट वितरण गर्न अधिकार प्रदान गरेको छ । सफा नोटलाई पुनः प्रयोग गर्नका लागि ग्राहकहरुलाई समेत जनचेतना प्रदान गरेको देखिन्छ । नेपाल राष्ट्र बैंकमा वर्षाैदेखि थुप्रिएका सफा नोट पुनः प्रयोग लागि वितरण गरिएको नेपाल राष्ट्र बैंक सिद्धार्थनगरले जनाएको छ ।
पुराना तथा सफा नोट पुनः प्रयोग हुदाँ छपाईमा लाग्ने राष्ट्रको ठूलो रकम समेत बचत हुने नेपाल राष्ट्र बैंक सिद्धार्थनगरका प्रमुख सत्येन्द्र राज सुवेदीले जनाए । राष्ट्र बैंकले ग्राहकलाई कियू आर कोड मार्फत समेत नयाँ र सफा नोट प्राप्त गर्ने व्यवस्था गरेको छ ।
