बिशन गुरुङ ।
भैरहवा, कार्तिक २ । नेपालीहरुको महान पर्व दशै नजिकिएसंगै सीमापारी सुनौली बजारमा भिडभाड शुरु भएको छ । दैनिक एक हजार जना भन्दा बढि नेपाली सीमापारी पुगेर किनमेल गर्ने गरेको देखिन्छ, तर नेपालका भैरहवा, बुटवल क्षेत्रमा रहेको बजार भने सुनसान छन् ।
सिद्धार्थ उद्योग बाणिज्य संघ रुपन्देहीको पहलमा रु.१०० भन्दा धेरै समान भारतबाट खरिद गरेर ल्याउनेहरुलाई भन्सार शुल्क लिने व्यवस्था भन्सार विभागले गरेपनि कार्यान्वयन पक्ष कमजोर देखिएको छ । जसका कारण नेपालीहरु रुपन्देहीसंग सीमा जोडिएका भारतीय बजार सुनौली, भगवानपुर, कालिदह तथा कोलही र नौतनवासम्म किनमेल गर्न पुगेका छन् । रु. १०० को भन्दा बढी समान ल्याउँदा भन्सार शुल्क तिर्नुपर्ने बाध्यता विगतमा हँुदा कम नेपाली सीमाक्षेत्रमा किनमेल गर्न जाने गर्दथे । अहिले भने भन्सारमा कडाई नहुँदा भारतीय बजारमा किनमेल गर्न जानेहरुको सख्या अधिक देखिन्छ ।
चाडपर्वको शुरु भएसंगै भारतीय बजारबाट नेपालतर्फ अबैधरुपमा क्यारिङ गरेर करोडौंका चिनी, कपडा, खाद्यान्न, किरानाका समान, खसी र कुखुराहरु नेपाल भित्रिने गरेको सीमाक्षेत्रमा बस्ने नेपालीहरु बताउँछन् । यसको रोकथाम र न्यूनीकरणका लागि सरोकारवाला निकायले ध्यान दिन जरुरी छ ।
