पाल्पा, कात्र्तिक २२ । पाल्पा जिल्लाको मुझुङ्ग गाविस–२, बगैचास्थित कालिका माविका शिक्षक विद्यार्थीहरुले देउसी भैलो खेलेर पाँच लाख रुपैयाँ संकलन गरेका छन् ।
मावि तहको कक्षा ११ र १२ कक्षा सञ्चालनका लागि मुझुङ्ग गाविसभित्रका प्रत्येक घरधुरीमा देउसी भैलो खेलेको विद्यालयले जनाएको छ ।
विद्यार्थीहरुले अध्ययन गर्ने विद्यालयमा कक्षा दश सम्म पढाई सञ्चालन भएपनि मावि तहका दुई कक्षा सञ्चालन हुन नसक्दा विद्यार्थीहरु अन्यत्र जानुपर्ने बाध्यता रहेको विद्यालयका प्रअ जनार्दन पाण्डेयले जानकारी दिनुभयो ।
मावि सञ्चालनका लागि देउसी भैलो खेल्दा गाविसबासीले पाँच सय देखि १२ हजार सम्म आर्थिक सहयोग प्राप्त भएको विद्यालयले जनाएको छ । वडा वडामा देउसी भैलो खेल्दै शिक्षक र विद्यार्थीहरु पुग्दा स्थानीयबासिन्दा खुसी देखिएका थिए ।
०५६ सालमा कक्षा १० सम्मको पढाई हुदै आएपनि एसएलसी पछिको पढ्न यहाँका विद्यार्थीहरु छहरा, पालुङ्गमैनादी गाविसमा धाउनुपर्ने बाध्यता रहेको छ । मावि तहमा प्राविधिक विषयको पठनपाठन गर्न सकेको अवस्थामा अझै राम्रो हुने प्रअ पाण्डेयको भनाई छ ।
