नगरपालिका नबनाए भोलीदेखि कडा आन्दोलन गर्ने ः सात दल
स्थानीयद्वारा मानव साङलो बनाई २ घण्टा चक्काजाम
लुम्बिनीखबर
भैरहवा, मंसिर १२ । साबिकका हाटिवनगाई ,पडसरी, बगाहा, हाटी फर्साटिकर, वसन्तपुर, चिल्हिया र मैनहिया गाविसका जनताले आज भैरहवामा प्रदर्शन गरेका छन् ।
सो गाविसका ७ दलका नेताहरुको अगुवाईमा रुपन्देही सदरमुकाम भैरहवामा साबिकको गाविसलाई सिद्धार्थनगर नगरपालिकामा गाभिनुपर्नेमा कुनैलाई रोहिणी पारी त कुनैलाई तिनाउ पारीका गाउँपालिकामा प्रस्तावित गरिएको भन्दै विरोध गरेका हुन् ।
सयौँको संख्यामा रहेका स्थानीयहरुले स्थानीय संरचना तय गर्दा हचुवाको भरमा गरिएको भन्दै तत्काल सच्याएर सिद्धार्थनगर नगरपालिकामा साबिकका गाविसलाई नगाभिए कडा संघर्षका आन्दोलन गर्ने चेतावनी दिए ।
कांग्रेस, एमाले, माओवादी केन्द्र, राजमो, राष्ट्रिय जनमुक्ति पार्टी, माओवादी क्रान्तिकारी, नेकपा माले लगायतका दलहरुले आफ्नो पार्टीको झण्डा सहित भैरहवाको बुद्धचोकमा मानव साङलो बनाई २ घण्टा चक्काजाम समेत गरेका थिए ।
आन्दोलन रहरले नभई करले गर्नुपरेको मानव साङलोमा सहभागी नेपाली कांग्रेस रुपन्देही क्षेत्र नं २ का सभापति मातृका प्रसाद यादवले जनाए । आईतबारको आन्दोलन सांकेतिक भएको जनाउँदै तत्काल संरचना नसच्याए कडा आन्दोलन गर्ने एमाले नेता भरत पोखरेलले बताए ।
कसैलाई खोलापारी र कसैलाई खोलावारी गराएर भूगोल विभाजन गरिएको अवैज्ञानिक रहेकोले तत्काल सच्याउन माग गर्दै आन्दोलन गरिएको माओवादी केन्द्रका नेता उमेश खनालले जनाए ।
सरकारले तत्काल सच्याएर नजिकका गाविसलाई सिद्धार्थनगर नगरपालिकामा गाभ्नुपर्ने वा क्षेत्र नं २ लाई एकीकृत रुपमा राख्नुपर्ने आफूहरुको माग रहेको राष्ट्रिय जनमुक्ति पार्टीका नन्द प्रसाद गुरुङले जनाए ।
दलहरुले प्रत्येक गाविसमा संघर्ष समिति समेत बनाएका छन् ।
