लुम्बिनीखबर
भैरहवा, माघ २० । नेवारी परम्परा अनुसार भैरहवामा २१ जना नेवारी कन्याको सामूहिक बेल विवाह सम्पन्न भएको छ । नेवाः खल सिद्धार्थनगर भैरहवाको आयोजनामा सम्पन्न बेल विवाह कार्यक्रम नेवारी संस्कार अनुसार पुरोहित हरिशरण राजोपाध्यायले गराएका थिए ।
पुरोहित राजोपाध्यायका अनुसार रजस्वला हुनुभन्दा अगाडि नेवारी कन्याको बेलविवाह गरेमा उनीहरु शुद्ध हुने गर्दछन् । बेलविवाह पश्चात नानीहरु कहिल्यै विधवा हुनुपर्दैन पछि आफ्ना श्रीमान्को देहावसान भएतापनि रातो रंगको पहिरन लगाउन पाउँदछन् । चन्द्रमानको हिसानबले कन्याको चिना हेरेर गरिने बेल विवाहमा सरिक कन्याको उमेर बिजोर वर्षको हुनुपर्दछ ।
बेलविवाह गरिसकेपछि नेवारी कन्या कुमारी नभई परिपक्व भएको मानिन्छ । कुमारी छँदासम्म सबै किसिमको छुट पाउने नेवारी कन्याले बेलविवाह पश्चात नेवारी संस्कारलाई बाध्यात्मक रुपमा अवलम्बन गर्नुपर्ने हुन्छ ।
नेवाः खल परिसर गल्लामण्डी पिपरैयामा बिहीबारदेखि भएको बेल विवाहको मुख्य कर्ता खलका पदाधिकारी तथा सदस्य रहेको राजेन्द्र श्रेष्ठले जानकारी दिए । नेवाः खलको व्यवस्थापनमा २०६३ सालदेखि पुरोहित राजोपाध्यायको उपस्थितिमा बेलविवाह हुँदै आएको खलका कार्यवाहक अध्यक्ष सुवर्णमुनि शाक्यले जानकारी दिए । शाक्यका अनुसार शुक्रबार सोही स्थलमा व्रतबन्धको कार्यक्रम पनि रहेको छ ।
