लुम्बिनीखबर
भैरहवा, जेठ २५ । कलेज पढ्ने युवतीहरुको साथबाट २ करोड ५० लाख मूल्य बराबरको अफीम बरामद भएको छ । नेपाल भारत सीमा नाका बेलहियाबाट नेपाल प्रहरीले सो मूल्य बराबरको लागूऔषध अफीम सहित ३ जना युवतिलाई पक्राउ समेत गरेको छ ।
इलाका प्रहरी कार्यालय बेलहियाका प्रहरी निरीक्षक रबिन बिष्टका अनुसार रुकुम घर भई दाङमा बस्ने ३ युवतीहरु १५ केजी अफीम लुकाइछिपाई भारततर्फ लैजाँदै गरेको अवस्थामा पक्राउ परेका हुन् ।
यसरी पक्राउ पर्नेमा २७ वर्षीय बिषमाया बुढा, १९ वर्षीय कामना पुनमगर र २१ वर्षीय सकुन्तला बुढा रहेका छन् । उनीहरु मध्ये विषमाया र सकुन्तला घोराहीमा बसेर क्याम्पस पढिरहेका छन् भने कामना लालमटियामा ।
तिनै जना युवतीहरु रातीको बसमा चढी बुटवल आएर एक होटलमा आइ बसेका थिए । उनीहरुलाई सो अफीम सोही होटलमा दिइएको थियो । पक्राउ परेका युवतीहरुले आफूहरुलाई भाङ हो बोर्डर पारी पु¥याएर आएपछि ५ हजार पाउने भन्दै एकजना दाइले फोन मार्फत अहराएको बताए । ती दाइको नाम ठेगाना भने उनीहरुलाई थाहा नभएको जीकिर गरे ।
बरामदीत अफीमको बजार मूल्य २ करोड ५० लाख रहेको प्रहरीले जनाएको छ । विश्वबजारमा प्रतिकेजी अफीमको मूल्य १६ हजार युएस डलर प्रतिकेजी रहेको बताइएको छ । बरामदीत अफीम र पक्राउ परेका युवतीहरुलाई थप अनुसन्धानकोलागि जिल्ला प्रहरी कार्यालय रुपन्देहीमा बुझाइएको इप्रका बेलहियाले जनाएको छ ।
लागूऔषध नियन्त्रण ऐन २०३३ अनुसार प्रतिबन्धित लागूऔषध ओसार पसार गर्नेलाई १५ वर्ष कैद र ५ लाखदेखि २५ लाखसम्म जरिवानाको व्यवस्था छ ।
