भैरहवा, २१ भदौ । सशस्त्र प्रहरी बल राजस्व तथा भन्सार सुरक्षा गुल्म भैरहवाले भारतबाट अवैध रुपमा नेपाल भित्रिएका सामानहरु नियन्त्रणको अभियानलाई तीब्रता दिएको छ ।
बुधवार सुरक्षा गुल्मले ५० हजार मुल्य बराबरको कपडा बरामद गरी भैरहवा भन्सार कार्यालयमा बुझाएको छ । सशस्त्र प्रहरी बल राजस्व तथा भन्सार सुरक्षा गुल्म भैरहवाका प्रमुख सशस्त्र प्रहरी नायक उपरीक्षक श्रीराम कुंवरको कमाण्डमा गएको गस्ती टोलीले बगाहा क्षेत्रमा उक्त सामान बरामद गरेको हो ।
भदौ महिनामा मात्र राजस्व गस्तीले जिल्लाको विभिन्न स्थानबाट एक १ लाख ५३ हजार मुल्य बराबरको कपडा, हार्डवेयर, नटवोल्ट लगायतका सामानहरु बरामद गरी भन्सार चलान गरेको सशस्त्र प्रहरी बल राजस्व तथा भन्सार सुरक्षा गुल्म भैरहवाले जानकारी दिएको छ ।
चाडपर्वको समयमा हुने तस्करी रोक्नका लागि सशस्त्र प्रहरी बल राजस्व तथा भन्सार सुरक्षा गुल्म तयारी अवस्थामा अगाडि बढेको जानकारी दिँदै भन्सार सुरक्षा गुल्मको सूचना शाखाले जिल्लाको सबै क्षेत्रमा सादा पोषाक र युनिफर्ममा सशस्त्र प्रहरी परिचालन गरेको जनाएको छ ।
