लुम्बिनीखबर
भैरहवा, २६ बैशाख । नेपालको भरीमा हिजो देखि कक्षा १२ को परीक्षा सुरु भएको छ । कक्षा १२ को वार्षिक परीक्षा मंगलबार बिहान ८ बजे देखि मध्याह्न १२ बजे सम्म हुने भएको छ ।
राष्ट्रिय परीक्षा बोर्डका अनुसार परीक्षामा देशभरबाट कूल ४ लाख ६७ हजार ३ सय ८९ परीक्षार्थी सहभागी हुँदैछन् । जसका लागि देशभर १ हजार ४ सय ५७ परीक्षा केन्द्र निर्धारण गरिएको छ । यस वर्ष ५६ हजार भन्दा बढी विद्यार्थी ग्रेडवृद्धि परीक्षामा सहभागी हुने भएका छन् भने उनीहरुले जति विषयमा कम नम्बर आएको थियो सोही विषयको मात्र ग्रेड वृद्धि परीक्षा दिनु पर्नेछ ।
बोर्डका अनुसार ३ वा सोभन्दा बढी विषयमा ‘नन ग्रेड’ ल्याएका विद्यार्थीले यो वर्ष पूरै विषयको परीक्षा दिनुपर्ने भन्दै ६ विषयकै परीक्षा फाराम भरिए पनि शिक्षा, विज्ञान तथा प्रविधि मन्त्रालयले लेटर ग्रेडिङ निर्देशिका, २०७८ संशोधन गरे सँगै अब नन ग्रेडेड ल्याएका विषयको मात्रै परीक्षा दिए पुग्ने भएको छ ।
कोरोना भाइरसका कारण शैक्षिक सत्र २०७७ देखि प्रश्नपत्र प्रकाशन गर्न छाडेको बोर्डले अनलाइन माध्यमबाट प्रश्नपत्र पठाउने र परीक्षा केन्द्रले आफैँ प्रिन्ट गरेर वितरण गर्दै आएको छ ।
