श्यामबदन हरिजन
त्रिवेणी, १९ जेठ । पश्चिम नवलपरासी सुस्ता गाउँपालिकाले एक बर्षको अवधीमा भएको कार्यप्रगती समिक्षा कार्यलाई पत्रकार सम्मेलन जेठ १७ गते बुद्धबार आयोजना गरी सार्वजनिक गरेको छ ।
सुस्ता गाउँपालिका अध्यक्ष टेक नारायण उपाध्यायले सुस्ता गाउँपालिकामा सामाजिक सुरक्षाका छोरी सुनौलो भविष्य योजना कार्यक्रम सन्चालनमा ल्याइएको जस अन्तर्गत हाल सम्म १७० जनाले सेवा लिएको बताउनुभयो । गाउँपालिका अध्यक्ष उपाध्यायले कृषकहरुका लागि ५०० मेट्रीक टन क्षमताको शीत भन्डार निर्माण कार्य सम्पन्न भएको जानकारी दिनुभयो ।
गाउँपालिका अन्तर्गत शिपमुलक र रोजगार मुलक तालिम संचालन गरिएको ७० बर्ष माथि उमेर पुगेका ज्येष्ठ नागरिकहरुलाई घरमै पुगि उपचार कार्यको थालनी गरेको गाउँपालिका अध्यक्ष उपाध्यायले जनाउनुभयो ।
गाउँपालिका भित्रका बेरोजगार नागरिकलाई १०० दिनको रोजगार दिइएको, जसबाट वार्ड नम्बर १ र ४ मा खानेपानीको पाईप बिछ्याउने कार्य र वार्ड नम्बर ३ र ५ मा कृषि सडक निर्माण गरिएको कार्यक्रम अन्तर्गत ७० जनालाई रोजगारी प्रदान गरेको गाउँपालिका अध्यक्ष उपाध्यायले बताउनुभयो ।
गाउँपालिका भित्रका भौतिक निर्माण कार्य कालोपत्रे सडक ३ किलोमीटर , पि.सि.सि २.५ कि.मि, ग्राभेल ८ कि.मि र कल्भर्ट ५ ओटा निर्माण भै भौतिक प्रगती भएको जानकारी दिनुभयो ।
पत्रकार भेट्घाट कार्यक्रममा गाउँपालिका उपाध्यक्ष गिता देबी चौधरीले न्यायिक समितिको गतिविधि र प्रमुख प्रशासकिय अधिकृत बुद्ध प्रकाश पौडेलले ९४ योजना सम्झौता भएकोमा २७ ओटा योजना ठेक्का भएको बताउदै ३४.७९ प्रतिशत रकम खर्च भएको जानकारी दिनुभयो ।
