अन्जना चौहान
लुम्बिनी, १२ साउन । रुपन्देहीको लुम्बिनी साँस्कृतिक नगरपालिकामा निर्माण हुने एकिकृत खानेपानी, ढल व्यवस्थापन तथा ईन्सिनिरेटर आयोजना सम्बन्धी रायसुझाव संकलन कार्य सम्पन्न भएको छ ।
यो योजनाको लागि प्रारम्भिक वातावरणीय परिक्षण प्रतिवेदन तयारीको क्रममा आयोजना कार्यान्वयन हुँदा प्रत्यक्ष र अप्रत्यक्ष रुपमा प्रभावित पार्ने विषयहरुलाई लिएर स्थानीय सरोकारवालाहरुको राय सुझाव संकलन भएको हो ।
सो कार्यक्रमलाई सम्बोधन गर्दै लुम्बिनी साँस्कृतिक नगरपालिकाका मेयर सजरुदिन मुसलमानले नगरलाई जनताले चाहेजस्तो बनाउन खोजेको बताएका छन् ।
नगरबाट निस्केका फोहोरमैलालाई समुचित रुपमा व्यवस्थापन गर्ने कार्य अघि बढ्न सुरु भएको र सो विषयमा बृहत छलफल चलिरहेको जानकारी दिएका छन् ।
लुम्बिनी साँस्कृतिक नगरपालिकामा एकिकृत रुपमा विकास गर्न र नगरलाई स्वच्छ एवं हराभरा बनाउन सो आयोजना अघि सारिएको हो ।
विकासका काम गर्दा यस क्षेत्रका प्राकृतिक, भौतिक संरचना, साँस्कृतिक, सामाजिक, आर्थिक र पर्यटनमा असर नपर्ने गरि गर्नुपर्नेमा मेयर मुसलमानले जोड दिएका छन् ।
छलफलमा केन्द्रित भएको आयोजनालाई मुर्त रुप दिन आफु सकारात्मक भएको भन्दै सवैको साथ र सहयोगको अपेक्षा गरेका छन् ।
कार्यक्रममा उपप्रमुख कल्पना हरिजनले नगरबाट निस्केका ढललाई उचित रुपमा व्यवस्थापन गर्नुपर्ने आजको आवश्कयता देखिएको बताईएकी छन् । एकिकृत खानेपानीको विकासमा समेत नगर लागि परेको कुरा औँल्याएकी छन् ।
नगरपालिकामा भएको कार्यक्रममा वातावरण तथा ईन्जिनियरहरुले सो आयोजनाका बारेमा प्रस्तुतिकरण दिएका थिए । एकिकृत खानेपानी तथा ढल व्यवस्थापन आयोजना पानी पोखरी, काठमान्डौको आयोजनामा सार्वजनिक कार्यक्रम भएको थियो ।
