भैरहवा, मंसिर ३० । सहकारीको पाँचौं सिद्धान्त शिक्षा, तालिम र सूचना अनुरूप टुगा आस्था विकास बचत तथा ऋण सहकारी संस्था लिमिटेडले भैरहवा सेवा केन्द्रका शेयर सदस्यहरूका लागि आइतबार बोधि कटेज भैरहवामा सहकारी शिक्षा कार्यक्रम आयोजना गरेको छ । शिक्षा उपसमिति संयोजनमा सम्पन्न यस कार्यक्रमले सहकारी सिद्धान्त र वित्तीय व्यवस्थापनको ज्ञान प्रदान गर्दै सदस्यहरूको भूमिकालाई थप सशक्त बनाउन योगदान पुर्याएको छ ।
कार्यक्रमको अध्यक्षता शिक्षा उपसमिति संयोजक शारदा देवी पौडेलले गर्नुभएको थियो । प्रमुख अतिथिको रूपमा संस्थाका अध्यक्ष डी.बी. थापाले सहकारीको ऐतिहासिक पृष्ठभूमि र संस्थाको वर्तमान गतिविधि तथा सदस्यहरूको जिम्मेवारीबारे आफ्नो मन्तव्य राख्नुभयो । विशिष्ट अतिथिकारूपमा उपस्थित सिद्धार्थनगर नगरपालिकाका सहकारी शाखा प्रमुख कमलकान्त खनालले सहकारी सिद्धान्त, वित्तीय पारदर्शिता, र सहकारी सञ्चालनका प्रभावकारी उपायबारे विस्तृत जानकारी दिनुभएको थियो ।
कार्यक्रमको सञ्चालन शिक्षा उपसमिति सदस्य श्रवण कुमार थापाले गर्नुभएको थियो भने स्वागत मन्तव्य सञ्चालक थानेश्वर पाण्डेले दिनुभएको थियो । कार्यक्रममा ७० जना शेयर सदस्यहरूको उपस्थिति रहेको थियो । साथै, कार्यक्रममा २१ जना नयाँ सदस्यहरूको प्रवेश गराइएको थियो । नयाँ सदस्यहरूलाई संस्थाको कप उपहार प्रदान गरी स्वागत गरिएको थियो ।
सदस्यहरूको क्षमता विकासका लागि यो कार्यक्रम निकै प्रभावकारी भएको बताइएको छ । कार्यक्रमले सहकारीका सदस्यहरूलाई ज्ञान अभिवृद्धि गर्नुका साथै सहकारी गतिविधिमा थप सक्रिय बनाउने विश्वास लिइएको छ ।
टुगा आस्था विकास साकोसका ३ वटा सेवा केन्द्रसहित ६ हजार ८ सय ६० जना शेयर सदस्य छन् ।
