शहबाज खान । लुम्बिनीखबर
कृष्णनगर, पुस । कपिलवस्तु जिल्लाको कृष्णनगर नगरपालिकामा लुम्बिनी नेत्रालय भैरहवाको शाखा दैनिक रूपमा सञ्चालनमा आएको छ । भैरहवास्थित लुम्बिनी नेत्रालयका वरिष्ठ नेत्र विशेषज्ञहरू तथा छन्द (काले बाबु) नारायणी आँखा अस्पताल बहादुरगञ्जका पूर्व वरिष्ठ नेत्र विशेषज्ञहरूको टोलीद्वारा कृष्णनगर शाखामा विशिष्टीकृत आँखा उपचार सेवा सुरु गरिएको हो ।
नयाँ शाखाबाट भिट्रियो रेटिना क्लिनिक, कोर्निया क्लिनिक, ग्लुकोमा क्लिनिक तथा अत्याधुनिक टोपिकल फेको प्रविधिबाट मोतियाबिन्दुको शल्यक्रिया सेवा उपलब्ध गराइने नेत्रालयले जनाएको छ । मधुमेह र उच्च रक्तचापका कारण आँखाको पर्दामा पर्ने असर, रेटिनासम्बन्धी समस्या, कोर्निया प्रत्यारोपण, ग्लुकोमा उपचार तथा लेजर र सर्जरी सेवासमेत यहाँबाट प्रदान गरिनेछ ।
स्थापनाको अवसरमा लुम्बिनी नेत्रालयले विशेष छुटको व्यवस्था गरेको छ । जसअन्तर्गत निःशुल्क आँखा जाँच, डायग्नोस्टिक सेवामा ५० प्रतिशत छुट तथा एडभान्स फेको प्रविधिबाट गरिने मोतियाबिन्दुको अपरेशनमा ५० प्रतिशत छुट प्रदान गरिने जानकारी दिइएको छ । यो सुविधा २०८२ साल पौष १२, १३ र १४ गते (तदनुसार डिसेम्बर २७, २८ र २९) सम्म लागू हुने जनाइएको छ ।
कृष्णनगर शाखा विद्युत् कार्यालय अगाडि, मुख्य सडक, डा. अनवर अहमद खाँको क्लिनिक भवनमा सञ्चालनमा रहेको छ । स्थानीय नागरिकलाई गुणस्तरीय तथा विशेषज्ञ आँखा उपचार सेवा आफ्नै क्षेत्रमा उपलब्ध गराउने उद्देश्यले शाखा सञ्चालनमा ल्याइएको लुम्बिनी नेत्रालयले जनाएको छ ।
