शहबाज खान। लुम्बिनीखबर
कृष्णनगर, ३ भदौ। कपिलवस्तुको कृष्णनगर नगरपालिका वडा नम्बर १ बस्ने वर्ष ३३ का मुकेश कोरीले आफ्नो बुबाको हत्या गरेको रहस्य खुलेको छ ।
इलाका प्रहरी कार्यालय कृष्णनगरका अनुसार छोराले बुबाको हात बाँधेर पोखरीमा डुबाएर हत्या गरेकोे प्रहरीको अनुसन्धानबाट खुलेको छ ।
छोराले घरायसी विवादका कारण बुबाको हत्या भएको खुलेको बताइएको छ ।
प्रहरीले जिल्ला अदालत कपिलवस्तुको आदेशले पुर्पक्षका लागि कारागार चलान भएको जनाएको छ ।
गत असार २४ गते साँझ देखि हराएका ५५ बर्षीय गत असार २६ गते बिहान ६ बजेको समयमा राम फेरे कोरी बढैया स्थित घर नजिकैको पोखरीमा मृत अवस्थामा फेला परेको प्रहरीको भनाई छ ।
मृत फेला परेका राम फेरे कोरीको दुबै हात पहेँलो गम्छाले बाँधेको अवस्थामा पोखरीको बिचमा घोप्टो अवस्थामा प्रहरीले फेला पारेपछि शंकास्पद मृत्यु देखेर प्रहरीले सुक्ष्म अनुसन्धान थालेको थियो ।
घटना भएको ७ दिनपछि श्रावण ३ गते हत्याको आशंकामा मृतकका झट्केला छोरा ३३ वर्षीय मुकेश कोरीलाई प्रहरीले नियन्त्रणमा लिई अनुसन्धान सुरु गरेको थियो ।
कपिलवस्तुका निमित्त प्रहरी प्रमुख प्रहरी निरीक्षक शैलेश्वरी बोहराले अनुसन्धानको २५ औँ दिनमा जिल्ला अदालत कपिलवस्तुमा मुद्दा दर्ता भएको जानकारी दिए ।
दिनहुँ जसो मदिरा सेवन गर्ने, घरायसी विवादमा झगडा परिरहने हुँदा मृतक र अभियुक्त बिच मनमुटाव भइरहने गरेको प्रहरी अनुसन्धानबाट खुलेको उनले बताए ।
