शहबाज खान । लुम्बिनीखबर
कृष्णनगर, २६ भदौ । कपिलवस्तु जिल्लाको कृष्णनगर भन्सार कार्यालयबाट अवैध तरिकाले यात्रुवाहक बस भित्रिने गरेका छन् । भन्सार कर्मचारीको मिलेमतोमा राति १० बजेपछि पनि सवारी साधन भित्रिने गरेको पाइएको छ । कृष्णनगर भन्सार कार्यालयमा भइरहेको अनियमितताको विषय लिएर विवादमा पर्दै आएको छ ।
भदौ २४ गते राति भारतबाट आएको नेपाली बस यात्री वाहक ९५२० नम्बर लेखेको बस राति ११ बजे भन्सार कर्मचारीको मिलोमातोमा नेपाल भित्रिएको पाइएको छ । स्रोतका अनुसार बिना चेक गरि नेपाल भित्रिएको छ । भन्सार कार्यालयको नियमानुसार राति १० बजेसम्म मात्रै सवारी साधन आवतजावत गर्न पाइन्छ ।
राति १० बजेपछि भारतबाट आएको सवारी साधन फर्कनु पर्ने फिर्ता वा भन्सार कार्यालयको प्राङ्गणमा पार्किंग गरि राख्नुपर्ने हुन्छ । भन्सार कार्यालयको समयमा खुलेपछि मात्रै जान पाउने नियम रहेको छ । तर अधिकांश नेपाल–भारत चल्ने यात्रुवाहक बसहरु नियम विपरीत भन्सार कार्यालयका कर्मचारीहरुको मिलेमतोमा राति १० बजेपछि आएका सवारी पनि नेपाल भित्रिने गरेको स्रोतले जनाएको छ ।
भन्सार कार्यालय कृष्णनगरका प्रमुख गगन बहादुर विश्वकर्माका अनुसार बिहान ६ बजेबाट राति १० बजेसम्म भन्सार गेट खुल्ने समय रहेको छ । भन्सार प्रमुखले नियम विपरीत यात्रुवाहक बस पठाएको आफुलाई थाहा नभएको बताएका छन् । उनले नियम विपरीत बस भित्रिएको हो वा होइन भन्ने विषयमा बुझ्ने बताए । भन्सार कार्यालयका कर्मचारीहरुकै मिलेमतोमा अनियमितता भइरहेको स्रोतको दावी छ ।
