भैरहवा, चैत १६। भैरहवामा जारी ‘ड्रिम युनिक रुपन्देही सुपरलिग’ एक दिवसीय क्रिकेट प्रतियोगितामा बिहीबारदेखि डिभिजन ‘ए’ को खेल सुरु भएको छ । डिभिजन ‘ए’ को पहिलो खेलमा सैनामैमा क्रिकेट क्लबले वेष्टर्न क्रिकेट क्लबलाई २ विकेटले पराजित गर्दै जित हात पारेको छ ।
भैरहवास्थित सिद्धार्थ क्रिकेट मैदानमा टस हारेर ब्याटिङको निम्तो पाएको वेष्टर्नले निर्धारित ५० ओभरमा ४१ ओभर खेल्दै सबै विकेट गुमाएर १ सय ६२ रनको मध्यमस्तरको योगफल बनायो । उसका लागि मिर्नाल गुरुङले ३३, दिपेश रोक्काले १९, सुमित श्रेष्ठले अविजित १९, भुवन पाण्डेले १८ र सन्देश थापाले १० रन बनाए । बलिङमा सैनामैनाका गणेश गौतमले ५ तथा डिलसद अली र सुनिल पौडेलले समान २(२ विकेट लिए ।
जवाफी ब्याटिङ गरेको सैनामैनाले ४४ ओभर ४ बलमा ८ विकेट गुमाउँदै १ सय ६५ रन बनायो र जित निकाल्यो । उसको जितमा निश्चल क्षेत्रीले अर्धशतकीय पारी खेल्दै ६१ रन बनाए । यस्तै, सुजन क्षेत्रीले २८ र डिलसद अलीले १३ रन जोडे । बलिङमा वेष्टर्नका दिनेश अधिकारीले ३ तथा अभिषेक गौतम र सुमित श्रेष्ठले समान २(२ विकेट लिए । सैनामैनाका गणेश गौतम म्यान अफ द म्याच भई एक हजार दुईसय रुपैयाँ पाए ।
रुपन्देही क्रिकेट संघको आयोजना तथा ड्रिम युनिक कन्सलटेन्सी प्रालि, बुटवलको मुख्य प्रायोजनामा जारी प्रतियोगिताको विजेता टिमले १ लाख १ हजार र उपविजेताले ५० हजार १ रुपैयाँसहित ट्रफी, मेडल र प्रमाणपत्र पाउनेछन् । म्यान अफ द सिरिजलाई १५ हजार, बेष्ट ब्याटर, बेष्ट बलर र उदयीमान खेलाडीलाई जनही ५ हजारसहित ट्रफी र प्रमाणपत्र प्रदान गरिनेछ । यस्तै प्रत्येक खेलको म्यान अफ द म्याचलाई १ हजार २ सय रुपैयाँ दिइनेछ । प्रतियोगितामा आगामी वैशाख ४ गतेसम्म सञ्चालन संघका सदस्यसमेत रहेका प्रतियोगिता संयोजक प्रथम पराजुलीले जानकारी दिए ।
