लुम्बिनीखबर
नवलपरासी, २४ फागुन । केही स्थानीय तहहरुले तलब भत्तामा मोटो रकम खर्चिने गरेपछि वडाका जनप्रतिनिधिहरुले त्यसको सदुपयोग गर्न सुरु गरेका छन् ।
उनीहरुले तलब भत्ता बापत पाएको रकम गरीब तथा बिपन्न समुदायलाई सहयोग गर्दै जनताबाट उठेको रकम जनतामै सहयोग गर्ने गरेका हुन् । नवलपरासीको सरावल गाउँपालिकाका वडा नम्बर ६ र ७ का वडाध्यक्ष कैलाश यादव र हयात अलिले तलब भत्ता बापत पाएको रकम विपन्न तथा गरीब समुदायका परिवारहरुको छोरीको विवाहमा नगद सहयोग गर्दै रकम बाँड्ने गरेका छन् ।
सरावल गाउँपालिकाबाट वडाध्यक्ष कैलाश यादवले हरेक महिना तलब बापत १५ हजार र विभिन्न बैठक तथा खर्च बापत गरी करीब ७ हजारको दरले २२ हजारसम्म गाउँपालिकाबाट आम्दानी गरेका छन् । उनले उक्त रकमबाट गरीब तथा बिपन्न समुदायका छोरीहरुको विवाहमा १० हजार सहयोग गर्दै आएको बताए ।
गत माघ महिनाबाट उनले अहिलेसम्म १० जना विपन्न समुदायका छोरीहरुको बिहेमा एक लाख सहयोग गरी सकेको बताए । साविकको रामपुर खडौना र बडहरा दुुबौलिया गाविसका ११ वटा गाउँ रहेको उक्त वडामा वर्षेनी १५ देखि २० जना विपन्न समुदायका छोरीहरुको बिहे पर्न सक्ने वडाध्यक्ष यादवको अनुमान छ ।
उनले जनताबाट कमाउने उद्देश्यभन्दा जनताको सेवा गर्ने उद्देश्यले जनप्रतिनिधि बनेकाले गाउँपालिकाबाट पाएको रकम जनतालाई सहयोग गरेको उनको भनाई छ । स्थानीय तहहरु अहिले महँगो समेत भएको वडाध्यक्ष यादवको बुझाई छ । यस्तै सरावल गाउँपालिका वडा नम्बर ७ का अध्यक्ष हेयात अलिले समेत गरीब तथा विपन्न समुदायका परिवारहरुको छोरीहरुको विवाहमा सक्दो सहयोग गर्न सुरु गरेका छन् ।
उनले न्यूनतम ५ हजारदेखि १० हजारसम्म सहयोग गर्ने गरेका हुन् । छोरीको विवाहमा धेरै खर्च हुने गरेको भन्दै आफूले तलब भत्ता बापतको रकम विपन्न समुदायको हितका लागि खर्चिने गरेको उनको भनाई छ । उनले छोरीहरुलाई उचित शिक्षाको व्यवस्था गर्न र दाईजो प्रथालाई हटाउनका लागि प्रयास गरिरहेको बताए ।
