देउखुरी (दाङ)। सामुदायिक वन समन्वय समिति तिनाउ पाल्पाले वातावरणीय सेवा भुक्तानी सम्बन्धी ऐन बनाउन माग गर्दै त्यसको मस्यौदा लुम्बिनी प्रदेशका सभामुख तुलाराम घर्ती मगरलाई बुझाएको छ ।
समितिका अध्यक्ष दल बहादुर गुरुङको नेतृत्वमा वरिष्ठ उपाध्यक्ष प्रेम प्रसाद पाण्डेय, उपाध्यक्ष शेरबहादुर थापा कोषाध्यक्ष विनोद बस्याल र सदस्यहरूको उपस्थितमा आज सभामुख घर्ती मगरलाई मस्यौदा बुझाएको हो ।
मस्यौदा बुझ्दै सभामुख तुलाराम घर्ती मगरले वातावरणीय सेवा भुक्तानी सम्बन्धी कानुन बनाउन आफूले पहल गर्ने बताउनु भयो । स्थानीयको सक्रियताबाटै सामुदायिक बन तथा वातावरणका साथै जलाधार क्षेत्रको ससंरक्षण भएको बताउनुहुँदै उहाँले त्यसको लाभ जनताले नै लिन पाउनु पर्छ भन्ने कुरा न्यायोचित रहेको उहाँको भनाई छ ।
मस्यौदामा तिनाउ नदी क्षेत्रलाई आधार मानी तल्लो तटीय र माथिल्लो तटीय क्षेत्रका बासिन्दाहरू लाभान्वित हुने गरी काम गर्न कानुन बनाउन आवश्यक रहेको समन्वय समितिको दावी छ । तिनाउ नदीको जलाधार क्षेत्रको संरक्षण र विकासको लागि मस्यौदामा परिषदको परिकल्पना गरिएको छ । बन तथा वातावरण मन्त्री अध्यक्ष रहने गरी परिषद गठन गर्न समेत बन समन्वय समितिले ध्यानाकर्षण गराएको छ ।
