लुम्बिनीखबर
भैरहवा, १२ असार । इरानको मसादबाट भारतले उद्धार गरी ल्याएका रुपन्देहीका दुईजना युवाहरु घर फर्किएका छन् । नेपाल सरकारको अनुरोधमा उद्धार गरिएका नेपालीहरुमध्ये दुईजना बुधबार कपिलववस्तुको कृष्णनगर नाका हुँदै बुटवलस्थित घरमा आइपुगेका हुन् ।
रुपन्देहीका प्रमुख जिल्ला अधिकारी बासुदेव घिमिरेले बुटवलका गणेशप्रसाद पोखरेल र सुमन गैरे घर आइपुगेको जनाए । ‘हामीले बेलहिया नाकामा उहाँहरुलाई पर्खिएर बसेका थियौं, तर, कृष्णनगर नाका हुँदै घर आइपुग्नु भएछ ।’ घिमिरले पोखरेलको परिवारसँग आफूले कुराकानी गरेको र राम्रैसँग घरमा आइपुगेको प्रतिक्रिया पाएको बताए । इजरायल र इरानबीच द्वन्द्व चर्किएपछि नेपालको अनुरोधमा केही नेपालीहरुलाई भारत सरकारले उद्धार गरेको थियो । यसमध्ये दुईजना रुपन्देहीका थिए । भारतस्थित नेपाली दूतावासले मंगलबार साँझ ट्विट गर्दै उनीहरु घर फर्किन लागेको जनाएको थियो ।
उद्धार पछि घर फर्किंदै गरेका पोखरेल र गैरेलाई सीमा नाकामा स्वागत गर्न प्रमुख जिल्ला अधिकारी घिमिरेको नेतृत्वमा सुरक्षा अधिकारीहरु बेलहिया नाका पुगेका थिए । तर, ४ बजेतिर मात्रै उनीहरु कृष्णनगर नाकाबाट घर फर्किएको खबर सुरक्षा अधिकारीहरुले पाएका थिए ।
दिल्ली–नेपाल चल्ने सिधा बसमार्फत् उनीहरु घर आइपुगेको घिमिरेले बताए । दिउँसो २–३ बजेको बीचमा पोखरेल र गैरे कृष्णनगर नाका हुँदै घर आइपुगेको पारिवारले जनाएका छन् ।
