लुम्बिनीखबर
भैरहवा, साउन । जिल्ला ट्राफिक प्रहरी कार्याल रुपन्देहीले कक्षा ८, ९ र १० मा अध्ययनरत २ सय वढि विद्यार्थीहरुलाई ट्राफिक सचेतना तथा दुर्घटना न्यूनिकरण सम्बन्धी प्रशिक्षण प्रदान गरेको छ ।
विहिवार भैरहवाको पश्चिमाञ्चल ईङ्गलिस स्कुलमा “विद्यार्थीका लागि ट्राफिक सचेतना तथा सडक दुर्घटना न्यूनिकरण” गर्न सैद्धान्तिक ज्ञान प्रदान गरेको जिल्ला ट्राफिक प्रहरी कार्यालय रुपन्देहीको सुचना शाखाले जनाएको छ ।
कार्यक्रमका प्रमुख अतिथि तथा लुम्बिनी प्रेस क्लबका अध्यक्ष कमल रायमाझीले ट्राफिक सचेतना नहुदा र ट्राफिक नियम पालना नगर्दा पछिल्लो समय दुर्घटनाको दर बढ्दोक्रममा रहेको बताउदै यसको न्यूनिकरणका लागि विद्यालय तहबाटै सचेतना जरुरी रहेको बताउनुभयो ।
उहाँले सडक प्रयोगकर्ताको लाहापर्वाहीपूर्ण सडक यात्रा गर्दा पनि सडक दुर्घटना हुनेभएकाले जिल्ला ट्राफिक प्रहरी कार्यालय रुपन्देहीले समुदाय तहमा पुगेर गरिरहेको ट्राफिक सचेतना उपलव्धीमूलक भएको धारणा व्यक्त गर्नुभयो ।
कार्यक्रममा जिल्ला ट्राफिक प्रहरी कार्यालय रुपन्देहीका प्रमुख प्रहरी निरीक्षक रन्जु के.सी.ले “विद्यार्थीका लागि ट्राफिक सचेतना तथा सडक दुर्घटना न्यूनिकरण” सम्बन्धी प्रशिक्षण दिदै सडक प्रयोग गर्दा ध्यान दिनुपर्ने विषयमा जानाकारी दिनुभयो ।
उहाँले विद्यार्थीले सडक पार गर्दा वा पैदल यात्रा गर्दा जेब्राक्रस प्रयोग गर्न आग्रह गदै सडकको दाया छेउबाट मात्र पैदल हिड्नुपर्ने प्रशिक्षणका क्रममा बताउनुभयो ।
सवारी साधन चलाउदा अनिवार्य सवारी चालक अनुमतीपत्रको जरुरी रहेको भन्दै प्रहरी निरीक्षक के.सी.ले सवारी दर्ता किताव (बिलबुक) समेत साथ हुनुपर्ने कानुनी प्रावधान भएको विद्यार्थीहरुलाई बताउनुभयो ।
कायक्रममा ट्राफिक चिन्ह तथा सवारीको गती, सवारी चलाउदा थाहापाउनुपर्ने नियमहरुको विषयमा जानाकारी गराईएको जिल्ला ट्राफिक प्रहरी कार्यालयका बरिष्ठ प्रहरी नायव निरीक्षक दुर्गादत्त भट्टले बताउनुभयो ।
प्रशिक्षण कार्यक्रममा जिल्ला ट्राफिक प्रहरी कार्यालय रुपन्देहीका प्रहरी सहायक निरीक्षक यूवराज सेनले विद्यालय तहबाटै ट्राफिक सचेतना आवश्यक रहेको भन्दै यहाँ सिकेको ज्ञान घरपरिवार तथा साथीभाईहरुलाई समेत सिकाउन आग्रह गर्नुभयो ।
पश्चिमाञ्चल ईङ्गलिस स्कुलका प्राचार्य तथा कार्यक्रमका अध्यक्ष राजु ढकालले ट्राफिक सचेतना कार्यक्रम विद्यार्थीहरुलाई जरुरी भएको भन्दै यस्ता कार्यक्रम बार्षिक रुपमा सवै विद्यालय तहमा हुनुपर्ने बताउनुभयो ।
पश्चिमाञ्चल ईङ्गलिस स्कुलका सहायक प्राचार्य नबराज ढुङ्गानाका स्वागत मन्तव्य तथा हिमलालको पाण्डेको सञ्चालनमा कार्यक्रम सम्पन्न भएको थियो ।
