लुम्बिनीखबर
भैरहवा । वरिष्ठ पत्रकार मनोरञ्जन शर्माको शनिबार निधन भएको छ । विगत दुई वर्षदेखि क्यान्सरबाट ग्रसित शर्माको उपचारका क्रममा शनिबार बेलुकी ५ बजे रुपन्देहीको भैरहवास्थित सिद्धार्थनगर सिटी हस्पिटलमा निधन भएको हो ।
शर्माले भैरहवा क्षेत्रलाई आधार बनाएर विगत दुई दशकदेखि सक्रिय पत्रकारिता गर्दै आउनुभएको थियो । उहाँ कारोबार दैनिक, न्यूज ओके सम्पादक लगायत विभिन्न सञ्चार माध्यममा आबद्ध रहनुभएको थियो । पत्रकारितामा समर्पित उहाँको योगदानले भैरहवा क्षेत्रको सञ्चार जगतमा विशेष पहिचान बनाएको थियो ।
लुम्बिनी प्रेस क्लब, रुपन्देहीका सल्लाहकार समेत रहनुभएका शर्माको निधनले सञ्चार क्षेत्रमा अपूरणीय क्षति पुगेको क्लबका अध्यक्ष कमल रायमाझीले बताउनुभयो । “शर्माको निधनले हामी सबैलाई गहिरो दुख लागेको छ । उहाँको पत्रकारिताप्रतिको लगन र समर्पण सधैं स्मरणीय रहनेछ,“ रायमाझीले भन्नुभयो ।
शर्माको परिवारमा श्रीमती, एक छोरी र एक छोरा छन् । पारिवारिक स्रोतका अनुसार, उहाँकोअन्त्येष्टि स्याङ्जा र पाल्पाको सङ्गमस्थलमा रहेको राम्दी घाटमा आइतवार गरियो ।
