लुम्बिनीखबर
सिद्धार्थनगर, १० मंसिर । म्यानमारबाट भगवान गौतम बुद्धको पवित्र जन्मस्थल लुम्बिनी भ्रमणका लागि आएका ९२ वर्षीय भिक्षु भदन्त पाउक सायादव अँचिन्नले सफलतापूर्वक डायलाइसिस सेवा लिएर स्वदेश फर्किनुभएको छ ।
लुम्बिनीमा २०,००० साल ९आयुर्वेदिक वृक्ष० का बिरुवा रोप्ने धार्मिक अभियानका साथ म्यानमारका भिक्षुहरूको टोली कात्तिक २८ गतेदेखि ३० गतेसम्म नेपाल भ्रमणमा थियो । सोही टोलीका वरिष्ठ भिक्षु भदन्त पाउक सायादव अँचिन्नलाई नियमित डायलाइसिस आवश्यक पर्ने भएकाले उहाँको स्वास्थ्य संवेदनशीलतालाई मध्यनजर गर्दै सिद्धार्थनगर सिटी हस्पिटलले विशेष व्यवस्था गरेको थियो ।
हस्पिटलको विदेशी पाहुनाहरूका लागि छुट्याइएको अन्तर्राष्ट्रिय डायलाइसिस युनिटमा धम्मा दायाद ध्यानकेन्द्रको प्राविधिक सहयोगमा भिक्षु महोदयलाई पाँच पटकसम्म सफल र सुरक्षित डायलाइसिस सेवा प्रदान गरिएको हस्पिटलका वरिष्ठ मृगौला रोग विशेषज्ञ डा.सुबोध कुमार पाण्डे जानकारी दिनुभयो ।
“उहाँ जस्तो वयोवृद्ध र सम्मानित भिक्षुको स्वास्थ्यलाई हामीले अत्यन्त संवेदनशीलतापूर्वक हेर्यौं । इन्टर्नेशनल युनिटमा छुट्टै कोठा, अनुभवी डायलाइसिस टेक्निसियन र चिकित्सकको टोलीले सेवा दिनुभयो,” वरिष्ठ मृगौला रोग विशेषज्ञ डा.सुबोध कुमार पाण्डे ले भन्नुभयो, “उहाँले सेवा पाएर अत्यन्त खुसी हुनुभयो र धन्यवादसहित म्यानमार फर्किनुभएको छ ।”
सिद्धार्थनगर सिटी हस्पिटलले नेपाली तथा विदेशी बिरामीलाई दुवैलाई संक्रमणमुक्त ९इनफेक्शन–फ्री० तथा पारिवारिक वातावरणमा डायलाइसिस सेवा दिँदै आएको छ । हस्पिटल स्रोतका अनुसार लुम्बिनी भ्रमणमा आउने विदेशी डायलाइसिस बिरामीहरूका लागि पनि यो सेवा सहज र विश्वसनीय रहेको भन्दै उहाँहरू निःसंकोच सेवा लिन सक्ने बताइएको छ ।
“एउटै छानामुनि सबै सुविधा उपलब्ध छ । लुम्बिनी आउने जो कोही विदेशी डायलाइसिस बिरामीले पनि यहाँ सेवा लिएर आफ्नो धार्मिक यात्रा सहजै पूरा गर्न सक्नुहुन्छ,” हस्पिटल स्रोतले जनाएको छ ।