पशुपति यादव । लुम्बिनीखबर
रोहिणी, मंसिर । रूपन्देही जिल्लाको ओमसतिया गाउँपालिकामा नेपाली कम्युनिस्ट पार्टी (नेकपा) को गाउँपालिका स्तरिय एकता कार्यक्रम भव्य रूपमा सम्पन्न भएको छ। यो कार्यक्रमले पार्टीको राष्ट्रिय एकताको सन्देशलाई स्थानीय तहसम्म पुर्याउने उद्देश्य पूरा गरेको छ। कार्यक्रममा हजारौं पार्टी कार्यकर्ता, नेता तथा स्थानीय जनताको उत्साहजनक सहभागिता रहेको थियो। सहभागीहरूले रातो झण्डा फहराउँदै नारा लगाएका थिए।
नेकपाको केन्द्रीय नेतृत्वले कात्तिक महिनामा वामपन्थी दलहरूको एकीकरणबाट नयाँ पार्टी गठन गरेको घोषणापछि देशभर एकता सन्देशसभा तथा समायोजन कार्यक्रमहरू तीव्र रूपमा अघि बढिरहेका छन्। यसै क्रममा ओमसतिया गाउँपालिकामा आयोजित कार्यक्रमले मधेस–तराई क्षेत्रमा पार्टीको संगठनलाई थप मजबुत बनाउने विश्वास गरिएको छ।
कार्यक्रमकी प्रमुख अतिथि नेकपाकी केन्द्रीय सदस्य सोनिया यादवले पार्टी एकताले नेपालको कम्युनिस्ट आन्दोलनलाई नयाँ उचाइमा पुर्याउने बताउनुभयो। कार्यक्रममा पार्टीको घोषणापत्रका मुख्य बुँदाहरूमा समाजवादी क्रान्ति, संविधानको रक्षा, भ्रष्टाचार नियन्त्रण, सुशासन, समावेशी विकास लगायतका प्रतिबद्धताहरू समेटिएका बताउनुभयो ।
कार्यक्रममा बोल्दै पूर्व संविधान सभा सदस्य तथा स्थानीय विकास राज्य मन्त्री घनश्याम यादवले भन्नुभयो, “हामीले कात्तिक १९ गते भृकुटीमण्डपमा ऐतिहासिक एकता सम्मेलन गरेर नेपाली कम्युनिस्ट पार्टी गठन गरेका छौं। यो एकता केवल नामको होइन, विचार, संगठन र कार्यनीतिको एकता हो। पूर्व माओवादी केन्द्र, एकीकृत समाजवादी लगायतका दलहरू मिलेर बनेको यो पार्टीले समाजवादको आधार तयार पार्ने लक्ष्य लिएको छ। ओमसतिया कम्युनिस्टहरूको लालकिल्ला हो। ग्रामीण क्षेत्रबाट यो सन्देश फैलाउनु आवश्यक छ।“
ओमसतिया गाउँपालिका नेकपाका लागि महत्वपूर्ण क्षेत्र हो। यहाँ पूर्व माओवादी केन्द्र र एकीकृत समाजवादीका कार्यकर्ताहरूको राम्रो उपस्थिति रहेको छ।
कार्यक्रममा कम्युनिस्ट नेता निर्मल जिसी, शिवकुमार धवल, प्रमोद यादव, विजय लक्ष्मी राय, बाबुलाल यादव, राधेश्याम गुप्ता, देवेन्द्र पाण्डे, इन्द्रजित यादव लगायतले पार्टी एकताको शुभकामना मन्तव्य राख्नुभएको थियो। उहाँहरूले नेकपाको एकता प्रक्रियामा ओमसतिया गाउँपालिकाले महत्वपूर्ण भूमिका खेल्ने बताउनुभयो।
नेकपाको केन्द्रीय नीतिअनुसार प्रदेश र जिल्ला स्तरमा एकता समायोजनको काम पुसको पहिलो हप्तासम्म सकिने योजना छ। यसैअनुरूप स्थानीय तहहरूमा पनि एकता कार्यक्रमहरू आयोजना भइरहेका छन्।
कार्यक्रमको समापन सत्रमा अध्यक्षता गर्नुभएका चन्नरप्रसाद यादवले मन्तव्य राख्दै एकता कार्यक्रमले पार्टी पंक्तिमा नयाँ ऊर्जा भरेको बताउनुभयो। कार्यक्रम शान्तिपूर्ण र अनुशासित रूपमा सम्पन्न भएको थियो।
अध्यक्ष यादवले नेकपाको यो एकता प्रक्रियाले नेपालको राजनीतिमा नयाँ अध्याय सुरु गरेको र पूर्वका विभाजित कम्युनिस्ट शक्तिहरू एक भएपछि अब एमालेसँग प्रतिस्पर्धा तीव्र हुने बताउनुभयो। तराई–मधेस क्षेत्रमा नेकपाको यो कार्यक्रमले पार्टीको आधार विस्तारमा महत्वपूर्ण भूमिका खेल्ने देखिन्छ।
यो कार्यक्रमले ओमसतिया गाउँपालिकाका बासिन्दालाई पार्टी एकताको सन्देश मात्र होइन, विकास र समृद्धिको आशा पनि दिएको उहाँले बताउनुभयो।
