पशुपति यादव। लुम्बिनीखबर
रोहिणी, पुस। ओमसतिया गाउँपालिका वडा नम्बर ६ मा अवस्थित छोटकी रामनगर माध्यमिक विद्यालयमा शुक्रबार वडाध्यक्ष र विद्यार्थीहरूबीच खुल्ला अन्तरक्रिया कार्यक्रम सम्पन्न भएको छ।
कार्यक्रममा विद्यालयको शैक्षिक, भौतिक र आर्थिक गुणस्तरीय पक्षका विभिन्न समस्या तथा सुधारका उपायहरूमा गहन छलफल गरेको आयोजकहरूले जनाएको छ।
कार्यक्रममा विद्यार्थीहरूले आफ्ना मागहरू राखेका थिए भने वडाध्यक्षले तत्काल सम्बोधन गर्ने प्रतिबद्धता जनाएका छन्।
कार्यक्रमको मुख्य उद्देश्य विद्यालयमा देखिएका कमी–कमजोरीहरूलाई पहिचान गरी सुधार गर्नु रहेको थियो। वडा नम्बर ६ का वडाध्यक्ष शिवकुमार धवलले कार्यक्रमलाई सम्बोधन गर्दै विद्यालय सुधारमा वडा कार्यालय, प्रधानाध्यापक, विद्यालय व्यवस्थापन समिति र विद्यार्थीहरूको सक्रिय सहभागिता अनिवार्य रहेको बताए। उनले भने, “विद्यालयप्रति विद्यार्थीहरूले देखाएका कमी–कमजोरी र असुविधाहरूलाई मुख्य विषय बनाएर छलफल गरिएको छ। शिक्षा सुधार वडा कार्यालयको एक्लो प्रयासले मात्र सम्भव छैन, सबैको सक्रियता जरुरी छ।”
कार्यक्रममा विद्यार्थीहरूले विद्यालयका आधारभूत सुविधाहरूको अभावलाई मुख्य मागको रूपमा उठाएका थिए। उनीहरूले खानेपानीको उचित व्यवस्थापन, सफा र पर्याप्त शौचालय, कक्षा कोठाहरूको मर्मत, डस्टबिनको व्यवस्था, झ्याल–ढोकाको सुधार र प्रयोगविहीन अवस्थामा रहेको कम्प्युटर ल्याबको तत्काल मर्मत तथा सञ्चालनको माग गरेका थिए। यी मागहरू विद्यालयमा दैनिक रूपमा भोग्नुपरेका असुविधाहरू रहेको विद्यार्थीहरुको भनाई छ। विद्यार्थीहरूले यस्ता आधारभूत सुविधाहरू नहुँदा पठनपाठनमा बाधा पुग्ने र स्वास्थ्यमा समेत जोखिम बढ्ने गुनासो पोखेका थिए। यसबाहेक, सीपमूलक शिक्षाको अभावलाई पनि उनीहरूले जोडदार रूपमा उठाएका थिए, जसले भविष्यमा रोजगारीका अवसरहरू सिर्जना गर्न सहयोग पुग्ने विश्वास उनीहरूको थियो।
वडाध्यक्ष शिवकुमार धवलले विद्यार्थीहरूका मागहरूलाई गम्भीरतापूर्वक लिएर तत्काल सम्बोधन गर्ने आश्वासन दिए। उनले विद्यालयमा अति आवश्यक सामग्रीहरू यथाशीघ्र वडा कार्यालयबाट उपलब्ध गराउने बताए। यसैगरी, सीपमूलक शिक्षालाई प्राथमिकता दिँदै वडा कार्यालयले उपलब्ध गराएका सातवटा सिलाई मेसिनलाई प्रभावकारी रूपमा उपयोग गर्न निर्देशन दिए। उनले प्रधानाध्यापकलाई कक्षा ६ देखि ८ सम्मका धेरै भन्दा धेरै विद्यार्थीहरूलाई सहभागी गराई प्रत्येक दिन सिलाई सिकाउने व्यवस्था मिलाउन स्पष्ट निर्देशन दिएका थिए।
यो कदमले विद्यार्थीहरूलाई किताबी ज्ञान मात्र नभई व्यावहारिक सीप प्रदान गरी आत्मनिर्भर बनाउने वडा अध्यक्ष धवलको विश्वास रहेको छ। वडाध्यक्ष धवलले यो कार्यक्रमले विद्यालय र वडा कार्यालयबीचको समन्वयलाई मजबुत बनाउने विश्वास व्यक्त गरे।
विद्यालयका प्रधानाध्यापकले कार्यक्रमलाई अत्यन्त उत्पादक रहेको बताए। उनले पानी व्यवस्थापन, शौचालय मर्मत, कक्षा कोठा सुधार, डस्टबिन व्यवस्था, झ्याल–ढोका मर्मत र कम्प्युटर ल्याबको छिटो मर्मत गर्ने प्रतिबद्धता जनाए। प्रधानाध्यापकका अनुसार, यी कार्यहरू छिट्टै पूरा गर्न विद्यालय व्यवस्थापन समिति र शिक्षकहरूको पूर्ण सहयोग रहनेछ। उनले वडाध्यक्षको सक्रियता र निर्देशनलाई स्वागत गर्दै यो अन्तरक्रियाले विद्यालयको समग्र विकासमा नयाँ आयाम थप्ने बताए। यसले विद्यार्थीहरूमा विद्यालयप्रतिको अपनत्व बढाउने र शैक्षिक गुणस्तर उकास्ने उनको विश्वास थियो।
कार्यक्रममा वडाअध्यक्ष, शिक्षक, कर्मचारी र विद्यार्थीहरूको सहभागिता रहेको थियो।
