अन्जना चौहान । लुम्बिनीखबर
लुम्बिनी, फागुन । नेपाली कांग्रेसका केन्द्रीय सदस्य तथा पूर्वमन्त्री भरत कुमार शाह यतिबेला घरदैलो कार्यक्रममार्फत मतदातासँग प्रत्यक्ष संवादमा व्यस्त छन् । लुम्बिनी संस्कृतिक नगरपालिका, सैनामैना नगरपालिका, कञ्चन गाउँपालिका लगायत रुपन्देही क्षेत्र नं. ५ का विभिन्न टोल–टोलमा पुगेर उनी नागरिकका समस्या, सुझाव र अपेक्षा सुन्दै विकासको प्रतिबद्धता व्यक्त गर्दै आएका छन् ।
शाहले शिक्षा, स्वास्थ्य, सडक पूर्वाधार, खानेपानी, कृषि आधुनिकीकरण तथा युवाहरूका लागि रोजगारी सृजनालाई मुख्य प्राथमिकतामा राखेका छन् । घरदैलो अभियानका क्रममा उनले भने, “जनताको साथ र विश्वासले मात्रै समृद्ध क्षेत्र निर्माण सम्भव छ । म विकास र पारदर्शिताको पक्षमा दृढ छु । जनताको दुःखलाई आफ्नै ठानेर काम गर्ने प्रतिज्ञा गर्दछु ।”
स्थानीयवासीहरूले शाहको विकासमुखी एजेन्डा र अनुभवलाई सकारात्मक रूपमा लिएका छन् । उनीहरूले आधारभूत आवश्यकता सम्बोधन गर्ने स्पष्ट योजना र जनतासँगको निरन्तर सम्पर्कलाई प्रशंसा गरेका छन् । एक स्थानीयले भने, “यस्तो नेता चाहिन्छ जसले घर–घर पुगेर सुन्छ र काम गर्छ ।”
नेपाली कांग्रेसका स्थानीय नेता तथा कार्यकर्ताहरूले पनि यो अभियानलाई तीव्र बनाएका छन् । लुम्बिनीदेखि सैनामैनासम्म टोल–टोलमा पुगेर पार्टीका आगामी कार्यक्रम, विकास योजनाहरूबारे छलफल भइरहेको छ । संगठन विस्तार, सदस्यता अभियान र जनसम्पर्क सुदृढीकरणका साथै नागरिकका गुनासा संकलन गरी सम्बोधन गर्ने उद्देश्यले यो अभियान सञ्चालन गरिएको पार्टीका तर्फबाट बताइएको छ ।
रुपन्देही क्षेत्र नं. ५ लाई नमुना विकास क्षेत्र बनाउने लक्ष्यसहित शाहको यो सक्रियता चुनावी तयारीसँगै जनतासँगको निरन्तर जोडाइको रूपमा हेरिएको छ । स्थानीय स्तरमा सडक, स्वास्थ्य केन्द्र, शिक्षालय सुधार र रोजगारीका अवसर बढाउने विषयमा विशेष जोड दिइएको छ ।
जनताको भरोसा जित्दै समृद्धिको यात्रामा अघि बढ्ने शाहको संकल्पले क्षेत्रमा सकारात्मक तरङ्ग ल्याएको देखिन्छ ।
