लुम्बिनीखबर
भैरहवा, ३० असार । रुपन्देहीको मायादेवी गाउँपालिका–३ ले भौतिक पूर्वाधार, कृषि, शिक्षा, स्वास्थ्य, रोजगारी तथा सामाजिक विकासलाई प्राथमिकतामा राख्दै स्थानीय सरकारको प्रभावकारी सेवा प्रवाहमार्फत आफूलाई जनमुखी वडाका रूपमा स्थापित गर्ने प्रयासलाई तीव्र बनाएको छ।
वडामा सडक, नाली, खानेपानी, सामुदायिक भवन तथा अन्य आधारभूत पूर्वाधार निर्माणसँगै कृषि उत्पादन वृद्धि, स्वास्थ्य सेवा विस्तार, शिक्षाको गुणस्तर सुधार तथा स्वरोजगारका कार्यक्रमलाई प्राथमिकताका साथ अघि बढाइएकाले स्थानीयवासीले विकासको प्रत्यक्ष अनुभूति गर्न थालेका छन्।
मायादेवी गाउँपालिका–३ का वडा अध्यक्ष मोहम्मद रफिक खानले विकासको केन्द्रबिन्दु नागरिकको आवश्यकता भएको बताउँदै वडाको बजेट जनताका प्राथमिकताका आधारमा खर्च गरिएको जानकारी दिनुभयो। उहाँले भन्नुभयो, “हामीले विकासलाई केवल सडक र भवन निर्माणमा सीमित गरेका छैनौँ। कृषिको आधुनिकीकरण, स्वास्थ्य सेवा विस्तार, शिक्षाको गुणस्तर सुधार, युवालाई रोजगार र स्वरोजगारसँग जोड्ने कार्यक्रमलाई पनि समान प्राथमिकतामा राखेका छौँ। जनताले आवश्यक ठानेका योजना कार्यान्वयन गर्नु नै हाम्रो पहिलो जिम्मेवारी हो।”
उहाँका अनुसार वडामा किसानलाई नगदेबाली उत्पादनतर्फ आकर्षित गर्न उन्नत कृषि प्रविधि, कृषि सामग्री तथा प्राविधिक सहयोग उपलब्ध गराउने कार्यक्रम सञ्चालन गरिएको छ। कृषि उत्पादन वृद्धि गर्दै किसानको आयआर्जन बढाउने उद्देश्यले विभिन्न तालिम तथा प्रविधि हस्तान्तरणका कार्यक्रमसमेत सञ्चालन गरिएको उहाँले बताउनुभयो। दोस्रो कार्यकालका लागि निर्वाचित वडा अध्यक्ष खानले विकासका लागि गाउँपालिका, प्रदेश सरकार र सङ्घीय सरकारसम्म पुगेर बजेट व्यवस्थापनमा पहल गर्दै आएको उल्लेख गर्नुभयो। वडाको आवश्यकतालाई सम्बोधन गर्न विभिन्न निकायसँग निरन्तर समन्वय गरिरहेको उहाँको भनाइ छ। “जनताले विश्वास गरेर दोस्रो पटक जिम्मेवारी दिएका छन्।
त्यो विश्वासलाई विकासका माध्यमबाट सार्थक बनाउने हाम्रो प्रयास निरन्तर छ,” उहाँले भन्नुभयो। वडा सचिव भोजबहादुर रायमाझीले वडाले सेवा प्रवाहलाई थप प्रभावकारी र पारदर्शी बनाउन प्रशासनिक सुधारसँगै विकास कार्यक्रमलाई परिणाममुखी ढङ्गले कार्यान्वयन गरिरहेको बताउनुभयो। उहाँका अनुसार स्वास्थ्य क्षेत्रमा आधारभूत स्वास्थ्य सेवाको पहुँच विस्तार, नियमित स्वास्थ्य शिविर, मातृ तथा शिशु स्वास्थ्य कार्यक्रम सञ्चालन गरिएका छन्। शिक्षा क्षेत्रमा विद्यालयको भौतिक सुधार, शैक्षिक वातावरण अभिवृद्धि तथा विद्यार्थी लक्षित कार्यक्रम सञ्चालन भइरहेका छन्।
“कृषि, शिक्षा, स्वास्थ्य, रोजगारी र सामाजिक विकासलाई सन्तुलित रूपमा अघि बढाउँदै नागरिकले स्थानीय सरकारको प्रत्यक्ष अनुभूति गर्ने वातावरण निर्माण गरिएको छ,” वडा सचिव रायमाझीले भन्नुभयो। वडामा कृषिलाई आर्थिक समृद्धिको मुख्य आधारका रूपमा विकास गर्ने नीति लिइएको छ। किसानलाई आधुनिक खेती प्रणाली अपनाउन प्रोत्साहन, उत्पादन वृद्धि तथा बजार व्यवस्थापनमा सहजीकरण गर्ने कार्यक्रम सञ्चालन गरिएका छन्। स्थानीय उत्पादन बढाउँदै कृषिलाई व्यावसायिक बनाउन वडा कार्यालयले विभिन्न निकायसँग सहकार्य गरिरहेको जनाएको छ। युवालाई सीपमूलक तालिममार्फत स्वरोजगारसँग जोड्ने प्रयाससमेत भइरहेको छ।
महिलाको आर्थिक सशक्तीकरण, सामाजिक समावेशीकरण तथा विपन्न समुदायको जीवनस्तर सुधारका कार्यक्रम पनि सञ्चालन गरिएका छन्। भौतिक पूर्वाधारतर्फ गाउँ तथा बस्ती जोड्ने सडक, नाली, खानेपानी तथा सार्वजनिक संरचनाको निर्माणलाई प्राथमिकतामा राखिएको छ। निर्माण भएका योजनाको गुणस्तर कायम गर्न नियमित अनुगमन र प्राविधिक मूल्याङ्कन गर्ने व्यवस्था मिलाइएको वडा कार्यालयले जनाएको छ। स्थानीयवासीका अनुसार पछिल्ला वर्षमा वडामा विकास निर्माणका गतिविधि बढेका छन्। आधारभूत सेवा विस्तार, कृषि प्रवर्द्धन तथा सामाजिक विकासका कार्यक्रमले नागरिकमा सकारात्मक प्रभाव परेको उनीहरूको भनाइ छ। विकास निर्माणसँगै सुशासन, पारदर्शिता र जनउत्तरदायी सेवा प्रवाहलाई प्राथमिकतामा राख्दै अघि बढिरहेको मायादेवी गाउँपालिका–३ ले आगामी दिनमा पनि नागरिकको जीवनस्तर उकास्ने कार्यक्रमलाई निरन्तरता दिने जनाएको छ।
स्थानीय सरकारको उद्देश्य नागरिकको आवश्यकता र अपेक्षाअनुसार विकासलाई गति दिने भएकाले जनसहभागितामूलक योजना, कृषि उत्पादन वृद्धि, गुणस्तरीय सेवा प्रवाह तथा सामाजिक रूपान्तरणका कार्यक्रमलाई आगामी वर्षहरूमा अझ विस्तार गरिने वडा कार्यालयको भनाइ छ। विकास, सुशासन र नागरिकमैत्री सेवाको अभ्यासमार्फत मायादेवी गाउँपालिका–३ नमुना वडा बन्ने दिशामा अघि बढिरहेको स्थानीयवासीको विश्वास छ।
