लुम्बिनीखबर
भैरहवा, साउन १४। सिद्धार्थ सञ्जाल रुपन्देहीले सुनसरी जिल्लामा भएको हिंसात्मक घटनाप्रति गहिरो दुःख र चिन्ता व्यक्त गर्दै घटनाको निष्पक्ष, पारदर्शी र प्रभावकारी अनुसन्धान गरी सत्यतथ्य सार्वजनिक गर्न तथा दोषी जोसुकै भए पनि कानुनबमोजिम कारबाही गर्न नेपाल सरकार र सम्बन्धित सुरक्षा निकायसँग जोडदार माग गरेको छ।
सञ्जालका अध्यक्ष अनिल कुमार ज्ञवालीद्वारा जारी प्रेस विज्ञप्तिमा उक्त घटनाले मानवीय क्षति हुनुका साथै सामाजिक सद्भाव, धार्मिक सहिष्णुता र राष्ट्रिय एकतामाथि गम्भीर असर पारेको उल्लेख गरिएको छ। विज्ञप्तिमा हिंसामा ज्यान गुमाएकाप्रति भावपूर्ण श्रद्धाञ्जली अर्पण गर्दै शोकसन्तप्त परिवारप्रति हार्दिक समवेदना व्यक्त गरिएको छ। साथै घटनामा घाइते भएकाहरूको शीघ्र स्वास्थ्यलाभको कामना गरिएको छ।
विज्ञप्तिमा नेपाल विविध धर्म, भाषा, जातजाति, संस्कृति र परम्पराले सम्पन्न बहुजातीय तथा बहुसांस्कृतिक मुलुक भएको उल्लेख गर्दै यही विविधता नेपालको मौलिक पहिचान र शक्ति भएको जनाइएको छ। नेपालको संविधानले प्रत्येक नागरिकलाई आफ्नो धर्म, संस्कृति र आस्थाको सम्मानपूर्वक अभ्यास गर्ने मौलिक अधिकार सुनिश्चित गरेको स्मरण गराउँदै कुनै पनि विवाद, असहमति वा मतभेदलाई हिंसा, आगजनी, तोडफोड, घृणा वा साम्प्रदायिक द्वन्द्व फैलाएर समाधान गर्न नसकिने स्पष्ट गरिएको छ।
सिद्धार्थ सञ्जालले सभ्य र लोकतान्त्रिक समाजमा उत्पन्न हुने कुनै पनि विवादको समाधान संवाद, सहिष्णुता, कानुनी प्रक्रिया र आपसी समझदारीबाट खोजिनुपर्नेमा जोड दिएको छ। हिंसाले कसैको पनि हित नगर्ने र त्यसबाट अन्ततः समाज, राष्ट्र तथा भावी पुस्ताले क्षति व्यहोर्नुपर्ने भएकाले सबै पक्षलाई संयम अपनाउन आग्रह गरिएको छ।
विज्ञप्तिमा सरकारले घटनाको गहिराइमा पुगेर निष्पक्ष अनुसन्धान गर्नुपर्ने आवश्यकता औंल्याइएको छ। घटनामा संलग्न व्यक्ति वा समूह जोसुकै भए पनि राजनीतिक, सामाजिक वा अन्य कुनै प्रभावबाट मुक्त भएर कानुनअनुसार कारबाही हुनुपर्ने सञ्जालको माग छ। यसले पीडितलाई न्याय दिलाउनुका साथै भविष्यमा यस्ता घटना दोहोरिन नदिन समेत सहयोग पुग्ने विश्वास व्यक्त गरिएको छ।
सञ्जालले सामाजिक सद्भाव र धार्मिक सहिष्णुतालाई नेपालको सामाजिक संरचनाको आधारशिला भएको उल्लेख गर्दै कुनै पनि समूहबीच अविश्वास, घृणा वा विभाजन सिर्जना गर्ने गतिविधि राष्ट्रिय हितविपरीत हुने जनाएको छ। त्यसैले शान्ति–सुरक्षा कायम राख्दै सबै समुदायबीच आपसी विश्वास, सम्मान र सहकार्यको वातावरण निर्माण गर्न सरकार, स्थानीय प्रशासन, सुरक्षा निकाय, राजनीतिक दल, नागरिक समाज तथा समुदायका अगुवाहरूले सक्रिय भूमिका खेल्नुपर्नेमा जोड दिइएको छ।
प्रेस विज्ञप्तिमा सामाजिक सञ्जाल र डिजिटल माध्यमको जिम्मेवार प्रयोग गर्न पनि विशेष आग्रह गरिएको छ। अपुष्ट सूचना, अफवाह, भ्रामक सामग्री तथा भड्काउ अभिव्यक्तिले तनाव झन् बढाउन सक्ने भएकाले तथ्य पुष्टि नभएका सामग्री प्रचार–प्रसार नगर्न सम्पूर्ण नागरिक, सञ्चारमाध्यम, सामाजिक अभियन्ता तथा सरोकारवालासँग अपिल गरिएको छ। सूचना सम्प्रेषण गर्दा सत्यता, संवेदनशीलता र सामाजिक उत्तरदायित्वलाई प्राथमिकतामा राख्नुपर्ने सञ्जालको धारणा छ।
सञ्जालले सञ्चारमाध्यमको भूमिका पनि यस अवस्थामा अत्यन्त महत्वपूर्ण हुने उल्लेख गरेको छ। समाचार सम्प्रेषण गर्दा तथ्यमा आधारित, सन्तुलित र जिम्मेवार पत्रकारिताको अभ्यास आवश्यक रहेको जनाउँदै उत्तेजना फैलाउने वा समुदायबीच द्वेष बढाउने भाषाको प्रयोग नगर्न सञ्चार क्षेत्रलाई आग्रह गरिएको छ।
विज्ञप्तिमा नेपालको संविधानले सुनिश्चित गरेको कानुनी शासन, मानवअधिकार, धार्मिक स्वतन्त्रता र सामाजिक सद्भावको संरक्षण सबै नागरिकको साझा दायित्व भएको उल्लेख गरिएको छ। त्यसैले कुनै पनि व्यक्तिले आफ्नो असहमति वा विचार हिंसात्मक माध्यमबाट व्यक्त गर्नु लोकतान्त्रिक मूल्य–मान्यता विपरीत हुने जनाइएको छ।
सिद्धार्थ सञ्जाल रुपन्देहीले राष्ट्रिय एकता, धार्मिक सहिष्णुता, सामाजिक सद्भाव, शान्ति र कानुनी शासनप्रति आफ्नो प्रतिबद्धता दोहोर्याउँदै सम्पूर्ण नेपाली दाजुभाइ तथा दिदीबहिनीलाई संयम, धैर्य, आपसी सम्मान र जिम्मेवारीका साथ सामाजिक सद्भाव सुदृढ बनाउन सहयोग गर्न हार्दिक अपिल गरेको छ।
विज्ञप्तिको अन्त्यमा “हाम्रो विविधता नै हाम्रो शक्ति हो, शान्ति, सद्भाव र एकता नै समृद्ध नेपालको आधार हो” भन्ने सन्देशमार्फत सबै नेपालीलाई विभाजनभन्दा एकता, हिंसाभन्दा संवाद र द्वन्द्वभन्दा सहकार्यको बाटो रोज्न आग्रह गरिएको छ।
