लुम्बिनीखबर
भैरहवा, २२ भदौ । लुम्बिनी प्रदेशका निजी अस्पताल सञ्चालकहरूले अस्पताल नवीकरणको वर्तमान व्यवस्थालाई व्यवहारिक बनाउन माग गरेका छन् । उनीहरूले अन्य प्रदेशमा समेत नवीकरणको अवधि बढाइएको उल्लेख गर्दै लुम्बिनीमा पनि नवीकरणको अवधि तीन वर्षबाट बढाएर पाँच वर्ष कायम गर्न सरकारसँग आग्रह गरेका हुन् । रुपन्देहीको बुटवलमा लुम्बिनी प्रदेशका स्वास्थ्य मन्त्री दीपेन्द्र पुनसँग भएको भेटमा निजी अस्पताल सञ्चालकहरूले अस्पताल सञ्चालन तथा नवीकरणसँग सम्बन्धित विद्यमान व्यवस्थाका कारण निजी स्वास्थ्य संस्थाले अनावश्यक प्रशासनिक झण्झट व्यहोर्नुपरेको बताएका थिए ।
भेटमा निजी स्वास्थ्य संस्थाको नियमित अनुगमन तथा नियमन आवश्यकताअनुसार जुनसुकै समयमा गर्न सकिने भएकाले नवीकरणको अवधि बढाउँदा व्यावहारिक हुने उनीहरूको भनाइ थियो । अस्पतालको नवीकरणका लागि पटक–पटक प्रशासनिक प्रक्रिया पूरा गर्नुपर्ने अवस्थाले स्वास्थ्य सेवा प्रवाहमा समेत असहजता सिर्जना गरेको उनीहरूले बताएका थिए ।
तिनाउ अस्पताल बुटवलका पूर्वअध्यक्ष रुद्र कार्कीले निजी स्वास्थ्य संस्थाको नवीकरण अवधि बढाउने विषयसँगै निजी स्वास्थ्य क्षेत्रलाई व्यवस्थित र प्रभावकारी बनाउन प्रदेश सरकारले स्पष्ट नीति लिनुपर्ने बताउनुभयो । उहाँले निजी अस्पताल र स्वास्थ्य संस्थाले प्रदेशको स्वास्थ्य सेवामा महत्वपूर्ण योगदान गरिरहेको उल्लेख गर्दै सरकार र निजी क्षेत्रबीच समन्वय तथा सहकार्य आवश्यक रहेको बताउनुभयो ।
भेटमा निजी अस्पताल सञ्चालकहरूले नवनियुक्त स्वास्थ्यमन्त्री पुनलाई कार्यकालको शुभकामना दिँदै निजी स्वास्थ्य क्षेत्रसँग सहकार्य गरी देखिने गरी सुधारका काम अघि बढाउन आग्रह गरेका थिए । उनीहरूले निजी क्षेत्रका स्वास्थ्यकर्मी तथा जनशक्तिका लागि तालिमको व्यवस्था गर्नुपर्ने, अस्पतालजन्य फोहरमैला व्यवस्थापनलाई व्यवस्थित बनाउन सरकारले आवश्यक सहजीकरण गर्नुपर्ने तथा निजी स्वास्थ्य संस्थाका समस्या समाधानका लागि नियमित संवादको व्यवस्था गर्नुपर्ने मागसमेत राखेका थिए ।
स्वास्थ्य मन्त्रीका स्वकीय सचिव टेकम ओलीले निजी अस्पताल सञ्चालकहरूले राखेका माग र सुझावका विषयमा मन्त्री पुनले आवश्यक छलफल तथा सहजीकरण गर्ने बताउनुभएको जानकारी दिनुभयो ।
