भन्सार छलीका सामान बरामद, स्कुटर र मोटरसाइकलसहित साढे ३ लाख बढीको सामान नियन्त्रणमा

लुम्बिनीखबर

भैरहवा, १६ भदौ। जिल्ला प्रहरी कार्यालय रुपन्देहीबाट खटिएको प्रहरी टोलीले जिल्लाका विभिन्न स्थानबाट भन्सार छली चोरी–पैठारी गरी ल्याइएका करिब ३ लाख ५४ हजार ९ सय ९८ रुपैयाँ बराबरका सामान नियन्त्रणमा लिएको छ ।

प्रहरीले २०८३ साल भदौ १५ गते विभिन्न स्थानमा चेकजाँच गर्ने क्रममा अवैध रूपमा भन्सार छली गरी ल्याइएका सामान बरामद गरेको हो । नियन्त्रणमा लिइएका सामान आवश्यक कारबाहीका लागि भन्सार कार्यालय बेलहिया, रुपन्देही पठाइएको प्रहरीले जनाएको छ ।

मायादेवी गाउँपालिका–६ स्थित गुरवनियाचोकबाट प्रहरीले करिब ४० हजार रुपैयाँ बराबरको ४० किलो नरिवल बरामद गरेको छ ।

त्यस्तै, रोहिणी गाउँपालिका–२ स्थित खुरहुरियाबाट करिब २ लाख ७९ हजार ९ सय ९८ रुपैयाँ बराबरको सामान बरामद गरिएको छ । प्रहरीले लु.प्र. ०१–००५ प २३७२ नम्बरको स्कुटरसहित Underarm Roll-on ३२ पिस, Mama Earth Face Cream १० पिस, Dot & Key Sunscreen १९ पिस लगायत विभिन्न कस्मेटिक सामान नियन्त्रणमा लिएको हो ।

यसैगरी, मायादेवी गाउँपालिका–३ स्थित बरेवाबाट करिब ३५ हजार रुपैयाँ बराबरको सामान बरामद भएको छ । उक्त स्थानबाट लु.२५ प ३२४४ नम्बरको मोटरसाइकलसहित १०० किलो चिनी नियन्त्रणमा लिइएको प्रहरीले जनाएको छ ।

प्रहरीले बरामद गरिएका सम्पूर्ण सामान आवश्यक अनुसन्धान तथा कारबाहीका लागि भन्सार कार्यालय बेलहिया पठाएको जनाएको छ।