लुम्बिनीखबर
भैरहवा, १३ कात्तिक । राष्ट्रिय स्वतन्त्र पार्टी (रास्वपा) का सांसद सुलभ खरेलले निर्वाचन क्षेत्रका समस्या समाधान र विकास निर्माणलाई गति दिन जनप्रतिनिधि र पत्रकारबीच सहकार्य आवश्यक रहेको बताउनुभएको छ । बुटवलस्थित आफ्नो सम्पर्क कार्यालयमा पत्रकारसँग कुरा गर्दै उहाँले दलगत राजनीतिभन्दा माथि उठेर जनताले अपेक्षा गरेको परिवर्तनका लागि एकजुट हुन आग्रह गर्नुभयो । नागरिकका गुनासा र सुझाव संकलन गरी आवश्यक विषय संसद्मा उठाउने तथा सञ्चार क्षेत्रका समस्या समाधानका लागि पहल गर्ने उहाँले बताउनुभयो ।
सांसद खरेलले गौतमबुद्ध अन्तर्राष्ट्रिय विमानस्थल र बुटवल अन्तर्राष्ट्रिय सम्मेलन केन्द्र सञ्चालन, बुटवल–गोरुसिङ्गे सडक निर्माणमा भइरहेको ढिलाइ, झुम्सा खानेपानी आयोजना, तिनाउ नदी व्यवस्थापन र सुकुम्बासी समस्या समाधानका लागि पहल गर्ने प्रतिबद्धता व्यक्त गर्नुभयो । दसैँ बिदाका क्रममा गृहक्षेत्र आउनुभएका सांसद खरेलले रुपन्देही–२ का विभिन्न सरोकारवालासँग समसामयिक विषयमा छलफल गरिरहेको उहाँको सचिवालयले जनाएको छ ।
